ယာရူစိင်၊ ကျံရ်ဇူန် ဆငည်း 18၊ တော်င်စီး
ကဝ်အီဂေါည်ပတော်င်စီးနီန်အူအီး က္လာင်းတဆျှိုည်ဖီမျေဒါႈ ပကီုင်းတော်င်စီး ကပီုန်ဆျှံမ်ကဒါႇက်ြုမ် အ်ုန်အီမိုႈဒီပ်ုန်ထိင်ခြဲ တံပ်ကညာအာဏာဆီုက်ဇေဝ်နီန် တံပ်ကညာအာဏာဆီုက်ဇေဝ်ကဲ ဆူည်ႇကညာဆဴင် ကဲအီအာဝ်ခ္လါည်း ဘေဲႇဆဴင်ဘုက်ဆဴင်ကဒါႇဘြာန်ဒိူန် ထာမ်းရိူန်းတာမ် 2ဆဲန်အောႏ။
တံပ်ကညာအာဏာဆီုက်ဇေဝ်ကဲ ဘိူည်အူန်း ကျံရ်ဇူန် ဆငည်း 5ဒိူန်မိုႈဆငည်းရဘံန်းဆူတ်ဆူတ် က္လာင်းအူန်း ကနာည်နံင်ခ္လါည်းပဲန်ဘေဲႇဘြာန်မာ် ဆဴင်မံင်ခ္လ ကဲအီဆီုင်ဂီုည်က္လံပ်အူန်းဘေဲႇအီန်ဂလိက်ကဲဒိူန် ဘ်ုပ်ထာမ်းရိူန်း 2ဆဲန်အောႏ။
“ကဲတောပ်ဒေတိူရ်ႈခေဲင်ကီုင်းအောႏ။ တောပ်ဘည်ဆငည်းက္လာင်းအူန်း ဆာ်အီးညှံမ်ခ္လါည်း ကဲကဲပ်ရိူန်း 2ဆဲန်။ ကဲဘိူည်အာဝ်က္လာင်းအူန်း မိုႈတကဲနံင်ဒဲႈတာမ်မာ် ကဇေန်နီး ဟည်ဘ်ုပ်ဒဲႈဟာဝ်း 2ဆဲန်ယာ့်။ ခေဲင်တိုအီးပ်ုန်နံပ်အော 2အီး ဟည်ဘ်ုပ်ထာမ်း အူအီး 2ဆဲန်”
အ်ုန်ဆီုပ်ဒါႈဘိုး တီုင်ဌာနအီကဆီုဝ်ကဆဲင်ကဲ တောပ်ပွံတ်ဒေကဲပ်ရိူန်းတာမ် တကဲအီက္လံပ်အူန်းဘေဲႇအီန်ဂလိက်ကဲနီန် မောကံပ်ရောတ်ပဆဴင်အောႏ။
ကနာည်နံင်ခ္လါည်းက္လံပ်ဆဴင်ဘုက် ဘေဲႇအီန်ဂလိက်ကဲဒိူန် ပဲန်ဘေဲႇဘြာန် တီုင်ဌာနအီကဆီုဝ်ကဆဲင် ကဲအီဂေါည်ပကီုင်းတော်င်စီးနီန် တောပ်ဒေက္လာင်း ခည်ကျံရ်ဇူန် ဆငည်း 11ဒိူန်အောႏ။
ဆဲႈဒါႇဆဴင်ဟောမ်တျံင်၊ ဆဴင်ဂြူ၊ ဆဴင်ႎှုင်၊ ဆဴင်လည် ကဲအီဂေါည်ပကီုင်းတော်င်စီးနီန် ဆဴင်ကဲအီက္လံပ်အူန်းဆဴင်ဘုက် ဒါဘေဲႇအီန်ဂလိက်ကဲဒိူန်မာ် ကဲဟည်ဆူည်ႇဒိုည်ႇ ခ္လါည်းကိက်ပဲန် ဘေဲႇဘြာန်အောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဆျှိုည်ဖီမျေဂဲနီန် အာဝ်ဝံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်နီန်။
