လွေးလာဝ်ဇာရ်၊ ဇွန်လ ၁၅ ရက်၊ အင်တော
ရှမ်းတောင် ရပ်စောက်မြို့နယ် အင်တောမြို့က လွယ်ဟောင်းကျေးရွာမှာ စစ်ကောင်စီတပ်က ရွာခံအားလုံးကို မောင်းထုတ်ပြီး ရွာထဲ တပ်စွဲထားတယ်လို့ ဖြစ်စဉ်သိရှိသူတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ ဇွန်လ ၈ ရက်မှာ အိမ်ခြေ ၂၅၀ ရှိတဲ့ လွယ်ဟောင်းရွာထဲ စစ်တပ် စတင်ဝင်ရောက်လာတာနဲ့ သေနတ် ဖောက်ပြီး ကလေးငယ်အပြင် သက်ကြီးရွယ်အိုတွေကိုပါ ဘုန်းကြီးကျောင်းမှာ စုခိုင်းခဲ့တာလို့ ၎င်းဒေသခံက ပြောဆိုပါတယ်။
“စဝင်လာတာနဲ့ သေနတ် ပစ်လာတာ။ အကုန်လုံး ဘုန်းကြီးကျောင်းမှာ လာစုခိုင်းတာ။ ကလေးတွေ အဘိုးအဘွားတွေအကုန်ဘဲ။ ရွာထဲ တစ်ယောက်မှ မရှိတော့ဘူး။ ကျောင်းမှာ ၃ ရက် ခေါ်ထားတာ။ ၃ ရက်မြောက်နေ့မှာ ရွာအပြင် မောင်းထုတ်တာ။ တစ်ယောက်မှ ရွာထဲ နေလို့ရဘူးတဲ့။ အခုချိန်ထိ ရွာထဲ ဝင်လို့မရဘူး”
စစ်တပ်ဟာ ရွာခံတွေကို မောင်းထုတ်ပြီး ရွာထဲ တပ်စွဲထားတာအပြင် ရွာခံတွေရဲ့ တန်ဖိုးရှိပစ္စည်း ရွှေ၊ ငွေ ခိုးယူပြီးတော့ မလိုအပ်တဲ့ ပစ္စည်းတွေကို မွှေနှောက်ထားတယ်လို့ သူက ဆက်ပြောပါတယ်။
“ကျောင်းမှာ ၃ ရက် နေခိုင်းတာ။ ကိုယ့်အိမ်ကို ဆန် သွားယူဖို့ ခွင့်တောင်းပြီး ပြန်တာတောင်မှ ဆဲခံရတယ်။ အိမ်ရောက်တော့ သူတို့ပစ္စည်းတွေ အကုန်မွှေထားတာ။ ရွှေငွေတွေ ယူသွားတယ်။ တန်ဖိုး ရှိပြီဆိုရင် ယူသွားပြီ။ သူတို့မလိုချင်တဲ့ ဆန်တွေ စပါးတွေတော့ ဒီအတိုင်း ပစ်ထားတာ။ မောင်းထုတ်ကတည်းက ဘာပစ္စည်းမှ ယူချိန်မရဘူး။ ဘုန်းကြီးကျောင်းကနေ တန်းမောင်းထုတ်တာ”
အလားတူ တခြားဓနုကျေးရွာမှာလည်း အခုလိုပုံစံနဲ့ ရွာခံတွေကို မောင်းထုတ်ပြီး ရွာထဲ တပ်စွဲထားတာ ရှိတယ်လို့ နောက်ထပ် ဒေသခံတစ်ဦးက ပြောပါတယ်။
ပြီးခဲ့တဲ့ မေလ ၁၃ ရက်က လွယ်ဟောင်းရွာမှာ အမျိုးသား ၂ ဦး မိုင်းနင်းမိပြီး အပြင်းအထန် ဒဏ်ရာ ရခဲ့ဖူးပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
