မိုင်းရူပ၊ ဇွန်လ ၁၁ ရက်၊ သိန္နီ
စစ်ကောင်စီထံ ပြန်လည်လွှဲပြောင်းပေးမယ်လို့ သတင်းတွေ ထွက်ပေါ်နေတဲ့ ကိုးကန့်တပ်မတော် MNDAA ထိန်းချုပ်ထားတဲ့ ရှမ်းမြောက် သိန္နီမြို့ထဲကို တရုတ်လူမျိုးတွေက ဝင်ရောက်နေထိုင်တာတွေ ရှိနေတယ်လို့ သိန္နီဒေသခံတွေက ရွှေဖီမြေကို ပြောပါတယ်။
တရုတ်နိုင်ငံရဲ့ ကြားဝင်စေ့စပ်မှုကြောင့် ကိုးကန့်တပ်က စစ်ကောင်စီနဲ့ အပစ်ရပ်ပြီးနောက် သိန္နီဒေသခံမဟုတ်တဲ့ တရုတ်လူမျိုးတွေဟာ သိန္နီမြို့ထဲကို ဝင်ရောက်လာပြီး အိမ်ခန်းနဲ့ မြေကွက်တွေ ငှားရမ်းကာ နေထိုင်နေကြတယ်လို့ ဆိုပါတယ်။
“တရုတ်လူမျိုးတွေ နေအိမ်တွေ ငှားပြီး လာနေတာ ရှိတယ်။ သိန္နီစျေးကိုလည်း ကွမ်းလုံသွားတဲ့ဘက်က ပန့်လောရွာမှာ ပြောင်းဖွင့်ထားတယ်။ စျေးဆိုင်တွေမှာလည်း တရုတ်စာ ကပ်ထားတဲ့ ဆိုင်းဘုတ်တွေ ဖြစ်ကုန်ပြီ” လို့ သိန္နီဒေသခံတစ်ဦးက ရွှေဖီမြေကို ပြောပါတယ်။
စစ်ကောင်စီတပ်ရဲ့ ဗုံးကြဲတိုက်ခိုက်မှုကြောင့် ပျက်စီးသွားတဲ့ သိန္နီမြို့မဈေးကို ကိုးကန့်တပ်ဘက်က ဖြိုချလိုက်ပြီး သန္နီ-ကွမ်းလုံလမ်း ပန်လောကျေးရွာမှာ ဈေးသစ်ဆောက်ပြီး ဆိုင်ခန်းငှားခ တစ်လစာကို ၄ သိန်းကျော်အထိ ရှိနေတာကြောင့် သာမန်ဒေသခံတွေ ဆိုင်ခန်းငှားဖို့ အခက်အခဲရှိနေတယ်လို့ သိရပါတယ်။
သိန္နီမြို့ကို လာမယ့် စက်တင်ဘာလထဲမှာ ကိုးကန့်တပ်က စစ်ကောင်စီထံ ပြန်ပေးမယ်လို့ သတင်းတွေထွက်နေပြီး ကိုးကန့်တပ်နဲ့ နီးစပ်သူ တစ်ဦးကတော့ ကိုးကန့်တပ်ဘက် သိန္နီဆေးရုံအပါအဝင် ပြန်လည်ပြင်ဆင်တာတွေ ပြုလုပ်နေပြီး စစ်ကောင်စီထံ ပြန်လည်လွှဲပြောင်းဖို့ ဖြစ်နိုင်ခြေနည်းတယ်လို့ ရွှေဖီမြေကို ပြောဆိုပါတယ်။
၁ဝ၂၇ စစ်ဆင်ရေးအတွင်း ပျက်စီးသွားတဲ့ သိန္နီမြို့အဝင် တံတားကိုလည်း ကိုးကန့်တပ်ဘက်က ပြန်လည်ပြုပြင်ခဲ့ပါတယ်။
သိန္နီမြို့ဟာ ၁၀၂၇ စစ်ဆင်ရေး ပထမလှိုင်းအတွင်း ကိုးကန့်တပ်နဲ့ နွေဦးတော်လှန်ရေးတပ်တွေ ပူးပေါင်းတိုက်ခိုက်ကာ သိမ်းပိုက်နိုင်ခဲ့တာဖြစ်ပြီး သိန္နီမြို့ဟာ လားရှိုး-မူဆယ် ပြည်ထောင်စု လမ်းမကြီးပေါ်မှာ တည်ရှိပြီး တရုတ်-မြန်မာ နယ်စပ်ကုန်သွယ်ရေးအတွက် အရေးပါတဲ့ လမ်းကြောင်းပေါ်မှာ တည်ရှိနေတာလည်း ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
