မိုင်းရူပ၊ ဇွန်လ ၁၀ ရက်၊ သိန္နီ
ကိုးကန့်တပ်ထိန်းချုပ်ထားတဲ့ ရှမ်းမြောက် သိန္နီမြို့ကနေ စစ်ကောင်စီထံ ပြန်ပေးမယ်ဆိုတဲ့ သတင်းတွေထွက်ပေါ်နေပါတယ်။
သိန္နီမြို့ကိုလာမယ့် စက်တင်ဘာလထဲမှာ လွှဲပြောင်းပေးရမယ်လို့ သတင်းတွေထွက်ပေါ်နေပြီး ကိုးကန့်တပ်နဲ့ နီးစပ်သူတစ်ဦးကတော့ လက်ရှိ သိန္နီမြို့ကနေ ပြန်ဆုတ်ဖို့ ဖြစ်နိုင်ချေနည်းတယ်လို့ ရွှေဖီမြေကို ပြောပါတယ်။
“ဆေးရုံဆိုလဲ တိုးချဲ့လည်ပတ်ဖို့ရှိနေတယ်။ လက်ရှိဒေသဆိုင်ရာသတင်းတွေလဲ ယူနေတုန်းဆိုတော့ ပြန်ဆုတ်ဖို့တော့ မရှိသလောက်ပါဘဲ” လို့ ဆိုပါတယ်။
ကိုးကန့်တပ်နဲ့ စစ်ကောင်စီတပ်ဘက်ကတော့ သိန္နီအခြေအနေနဲ့ ပတ်သက်ပြီး တစ်စုံတရာ သတင်းထုတ်ပြန်ထားတာ မရှိသေးပါဘူး။
သိန္နီမြို့ဟာ ၁၀၂၇ စစ်ဆင်ရေး ပထမလှိုင်းအတွင်း ကိုးကန့်တပ်နဲ့ နွေဦးတော်လှန်ရေးတပ်တွေ ပူးပေါင်းပြီး တိုက်ခိုက်သိမ်းပိုက်နိုင်ခဲ့တာ ဖြစ်ပါတယ်။
ပြီးခဲ့တဲ့ ဧပြီလ ၂၂ ရက်မှာ တရုတ်နိုင်ငံရဲ့ ကြားဝင်စေ့စပ်မှုနဲ့ ကိုးကန့်တပ်ထိန်းချုပ်ထားတဲ့ ရှမ်းမြောက် လားရှိုးမြို့ကို စစ်ကောင်စီထံ လွှဲပြောင်းခဲ့ရပြီး သိန္နီမြို့လည်း တရုတ်နိုင်ငံက ဖိအားပေးလာရင် MNDAA က စစ်ကောင်စီထံ ပြန်ပေးရနိုင်ခြေ ရှိတယ်လို့ သုံးသပ်မှုတွေ ရှိနေတာ ဖြစ်ပါတယ်။
သိန္နီမြို့ဟာ လားရှိုး-မူဆယ် ပြည်ထောင်စု လမ်းမကြီးပေါ်မှာ တည်ရှိပြီး တရုတ်-မြန်မာ နယ်စပ်ကုန်သွယ်ရေးအတွက် အရေးပါတဲ့ လမ်းကြောင်းပေါ်မှာ တည်ရှိနေတာ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
