ပို့လဘား၊ ဇွန်လ ၉ ရက်၊ ဆီဆိုင်
ရှမ်းတောင် ပအိုဝ်းဒေသ ဆီဆိုင်မြို့နယ်ရှိ ကျေးရွာအုပ်စု ၂ ခုက ဒေသခံ ၆ ထောင်ကျော်ကို စစ်ကောာင်စီ လက်အောက်ခံ ပအိုဝ်းပြည်သူ့စစ်- PNO က ကျေးရွာအတွင်းကနေ မောင်းထုတ်နေကြောင်း ပအိုဝ်းတပ်မတော်- PNLA က ထုတ်ပြန်ထားပါတယ်။
ဆီဆိုင်မြို့နယ်ရှိ နောင်ကျောကျေးရွာအုပ်စုထဲက တပူးထို၊ ကောင်ထို၊ လွယ်ငွန်း၊ နောင်ဗို၊ ပင်စက်ရွာ၊ တောင်ရှေ့အုပ်စုက နောင်ထောင် ၆ ရွာနဲ့ ကလားလမ်ရွာက ဒေသခံ ၆ ထောင်ကျော်ကို PNO က ဇွန်လ ၁၅ ရက် နောက်ဆုံးထားပြီး ကျေးရွာအတွင်းကနေ ထွက်ခွာရမယ်လို့ ပြောဆိုထားပါတယ်။
PNLA ရဲ့ ပြောရေးဆိုခွင့်ရှိသူ ခွန်ရိန်းယံက “သူတို့ ဒီလိုလုပ်တာက တော်လှန်ရေးနဲ့ လူထုတွေ အဆက်အသွယ် ပြတ်အောင် ထိစပ်မှုမရှိအောင် လုပ်ချင်နေတာ။ နောက်ပြီး ဒီလိုလုပ်တာ ပြည်သူလူထုရဲ့ ရပ်ရွာဥစ္စာပစ္စည်းတွေကို ပျက်စီးအောင် လုပ်တယ်လို့ပဲ မြင်တယ်။ သူတို့ပို့လာတဲ့ စာအရဆိုရင် ပြည်သူလူထုတွေက စစ်ရှောင်စခန်းမှာ သွားနေတာတို့ တောင်ယာဘက် သွားနေတာတို့ မပေးလုပ်တော့ဘူးလေ။ အဲဒီမွေတော်ဘုရားဘက် သွားစုကြမယ်ဆိုတဲ့ အမိန့်မျိုး ပေးလာတာ ဖြစ်ပါတယ်။ ဒါကတော့ သူတို့ပြည်သူလူထုကို ဖမ်းပြီး ထောင်ထဲ ထည့်လိုက်တာ အတူတူပဲ” လို့ ပြောပါတယ်။
ကျေးရွာခံတွေ ဇွန်လ ၁၅ ရက် နောက်ဆုံးထားပြီး ကျေးရွာအတွင်းကနေ ထွက်သွားရမယ်ဆိုပြီးတော့ ဇွန်လ ၇ ရက်မှာ PNO ဘက်က စာပို့လာတာဖြစ်တယ်လို့ ဆိုပါတယ်။
ဒါ့အပြင် ကျေးရွာကနေ ထွက်သွားသူအနေနဲ့ တောင်ယာ၊ စစ်ဘေးရှောင်စခန်းဘက် သွားရောက် နေထိုင်ခြင်း ခွင့်မပြုဘဲ ဆီဆိုင်မြို့နယ် ဘုရားဖြူကျေးရွာက မွေတော်ဘုရားဘက်သာ သွားရောက်ရမယ်လို့ PNLA ရဲ့ ထုတ်ပြန်ချက်ထဲ ရေးသားထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
