မိုင်းရူပ၊ ဇွန်လ ၄ ရက်၊ စဥ့်ကူး
စစ်ကောင်စီတပ်ဟာ အပစ်ရပ်သက်တမ်းတိုးထားပေမဲ့ တော်လှန်ရေးတပ်တွေ ထိန်းချုပ်ထားတဲ့ မန္တလေးတိုင်း စဥ့်ကူးမြို့ပေါ်ရှိ ဘုန်းကြီးကျောင်းကို ဗုံးကြဲတိုက်ခိုက်ခဲ့ရာ ဘုန်းကြီးကျောင်းဆောင် ၂ လုံး ပျက်စီးခဲ့တယ်လို့ ပြည်သူ့ကာကွယ်ရေးအဖွဲ့ ပြင်ဦးလွင်ခရိုင်က ထုတ်ပြန်ထားပါတယ်။
စဥ့်ကူးမြို့ပေါ်ရှိ မြသိန်းတန်ဘုရားနဲ့ ဘုန်းကြီးကျောင်းကို စစ်ကောင်စီတပ်က မနေ့ ဇွန်လ ၃ ရက် မနက် ၁၁ နာရီဝန်းကျင်မှာ ဂျက်ဖိုက်တာနဲ့ ဗုံးကြဲတိုက်ခိုက်ခဲ့တာ ဖြစ်ပါတယ်။
“မနေ့ စဥ့်ကူးမှာ ထပ်ကြဲတယ်။ ပေါင် ၃ဝဝ တစ်လုံး ကြဲသွားတယ်ဗျ”လို့ ပြည်သူ့ကာကွယ်ရေးအဖွဲ့ ပြင်ဦးလွင်ခရိုင်ရဲ့ တာဝန်ရှိသူတစ်ဦးက ရွှေဖီမြေကို ပြောပါတယ်။
စစ်ကောင်စီတပ်ဟာ ဇွန်လကုန်အထိ ယာယီအပစ်ရပ်ကြောင်း ထုတ်ပြန်ထားပြီးနောက် တော်လှန်ရေးတပ်တွေ ထိန်းချုပ်ထားတဲ့ မန္တလေးတိုင်းအတွင်းရှိ သပိတ်ကျင်း၊ စဥ့်ကူးမြို့နယ်တွေကို လေကြောင်းတိုက်ခိုက်မှုတွေ ဆက်တိုက်လုပ်ဆောင်နေပါတယ်။
ပြီးခဲ့တဲ့ ဇွန်လ ၁ ရက်မှာလည်း စဉ့်ကူးမြို့နယ် နွယ်ရုံနဲ့ နတ်တောင်ရွာကို ဂျက်ဖိုက်တာနဲ့ ဗုံး ၂ ကြိမ် ကြဲချတိုက်ခိုက်ခဲ့လို့ အမျိုးသမီး ၃ ဦး ဒဏ်ရာရခဲ့သလို Lucky 7 ဟိုတယ်အပါအဝင် နေအိမ် ၂ လုံး ထိမှန်ပျက်စီးခဲ့ပါတယ်။
ဒါ့အပြင် ပြီးခဲ့တဲ့ ဇွန်လတစ်ရက်တည်းမှာပင် စစ်ကောင်စီတပ်က သပိတ်ကျင်းမြို့နယ် ၄ မိုင်ရွာကို ဗုံးကြဲတိုက်ခိုက်ခဲ့လို့ စာသင်ကျောင်းဆောင် ပျက်စီးခဲ့ပါတယ်။
စစ်ကောင်စီတပ်ဟာ ငလျင်ဒဏ်သင့်ဒေသတွေမှာ ပြန်လည်ထူထောင်ရေးတွေ ပြုလုပ်နိုင်ဖို့၊ ရွေးကောက်ပွဲ ကျင်းပနိုင်ဖို့ဆိုပြီး ဇွန်လကုန်အထိ အပစ်ရပ်မယ်လို့ ဇွန်လ ၁ ရက်မှာ ထုတ်ပြန်ထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
