ရွှေဖီမြေ၊ ဇွန်လ ၄ ရက်
တအာင်းတပ်မတော် PSLF/TNLA ထိန်းချုပ်ထားတဲ့ နောင်ချို၊ မိုးကုတ်၊ ကျောက်မဲ၊ မိုင်းငေါ့၊ မိုင်းလုံနဲ့ မန်တုံမြို့နယ်တွေမှာ စစ်ကောင်စီကြောင့် ၁ လအတွင်း အရပ်သား ၈ ဦး သေဆုံးပြီး ၁၈ ဦး ဒဏ်ရာရခဲ့တယ်လို့ တအာင်းတပ်က ထုတ်ပြန်ပါတယ်။
ပြီးခဲ့တဲ့ မေလအတွင်း TNLA ထိန်းချုပ်ထားတဲ့ နောင်ချိုမြို့နယ်ထဲကို စစ်ကောင်စီတပ်က လေ ကြောင်းနဲ့ (၁၂) ကြိမ်၊ လက်နက်ကြီး (၇၇၆) လုံး၊ ဒရုန်းအသုံးပြုပြီး ဗုံး (၃၂၉) လုံးနဲ့ အဆိပ်ငွေ့ဗုံး (၁၄၄) လုံး ကြဲချတိုက်ခိုက်ခဲ့တယ်လို့ ဆိုပါတယ်။
နောင်ချိုမြို့နယ်ထဲမှာ စစ်ကောင်စီရဲ့ ဗုံးကြဲတိုက်ခိုက်မှုကြောင့် အရပ်သား ၆ ဦး သေဆုံးပြီး ၁၄ ဦး ထိခိုက်ဒဏ်ရာရခဲ့ပြီး နေအိမ် ၈ လုံး ပျက်စီးခဲ့ပါတယ်။
ဒါ့အပြင် ကျောက်မဲမှာ စစ်ကောင်စီတပ်က လေကြောင်းနဲ့ ဗုံး ၂ ကြိမ်၊ မိုးကုတ်မှာ ၆ ကြိမ် ဗုံးကြဲခဲ့ရာ အရပ်သား ၁ ဦး သေဆုံးကာ ၁ ဦး ဒဏ်ရာရခဲ့ပြီး ဘုန်ကြီးကျောင်းအပါအဝင် နေအိမ် ၁၈ လုံး ထိမှန်ပျက်စီးခဲ့ပါတယ်။
အလားတူ မန်တုံမြို့မှာလည်း စစ်ကောင်စီတပ်က လေယာဥ်နဲ့ ဗုံး ၂ ကြိမ် ကြဲချတိုက်ခိုက်ခဲ့ရာ အရပ်သား ၁ ဦး သေဆုံးပြီး ၃ ဦး ထိခိုက်ဒဏ်ရာခဲ့ပါတယ်။
စစ်ကောင်စီတပ်ဟာ လက်နက်ကြီးနဲ့ လေကြောင်းဗုံးကြဲ တိုက်ခိုက်တာတွေ ဆက်တိုက်ပြုလုပ်နေပြီး လူထုတွေအနေနဲ့ စစ်ရေးသတိရှိကြဖို့ PSLF/TNLA ရဲ့ ပြောရေးဆိုခွင့်ရှိသူ လွေးယေဦးက ပြီးခဲ့တဲ့ မေလ ၂၉ ရက်မှာ ရွှေဖီမြေကို ပြောဆိုထားပါတယ်။
စစ်ကောင်စီတပ်ဟာ ငလျင်လှုပ်ခတ်မှုကို အကြောင်းပြုပြီး ပြီးခဲ့တဲ့ ဧပြီလကစပြီး ယာယီအပစ်ရပ်ကြောင်း ထုတ်ပြန်ထားပေမဲ့ နိုင်ငံတဝန်းမှာ လေကြောင်းတိုက်ခိုက်မှုတွေ ဆက်လက်လုပ်ဆောင်နေပြီး အရပ်သားသေဆုံးမှုတွေလည် ဆက်လက်မြှင့်တက်နေပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
