လွေးထွေး၊ ဇွန်လ ၂ ရက်၊ စဉ့်ကူး
မန္တလေးတိုင်း စဉ့်ကူးမြို့နယ်ထဲက ရွာ ၂ ရွာကို တိုက်ပွဲ ဖြစ်ပွားတာမရှိဘဲ စစ်ကောင်စီတပ်က ဗုံးကြဲချတိုက်ခိုက်ခဲ့လို့ အမျိုးသမီး ၃ ဦး ဒဏ်ရာရခဲ့ကြောင်း ပြင်ဦးလွင်ခရိုင် ပကဖ သတင်းပြန်ကြားရေးတာဝန်ခံတစ်ဦးရဲ့ ပြောပြချက်အရ သိရပါတယ်။
စစ်ကောင်စီက အပစ်အခတ် ရပ်စဲကြောင်း နောက်ထပ် ၁ လ တိုးလိုက်တဲ့ မနေ့ ဇွန်လ ၁ ရက် နေ့လယ် ၂ နာရီခန့်မှာ စဉ့်ကူးမြို့နယ် နွယ်ရုံနဲ့ နတ်တောင်ရွာကို ဂျက်ဖိုက်တာနဲ့ ဗုံး ၂ ကြိမ် ကြဲချတိုက်ခိုက်ခဲ့လို့ အမျိုးသမီး ၃ ဦး ဒဏ်ရာ ရခဲ့သလို Lucky 7 ဟိုတယ်အပါအဝင် နေအိမ် ၂ လုံး ထိမှန်ပျက်စီးခဲ့ပါတယ်။
ပြင်ဦးလွင်ခရိုင် ပကဖ သတင်းတာဝန်ခံတစ်ဦးက “ထိမှန်တဲ့သူတွေက ရွာခံတွေပဲ ဖြစ်တယ်။ ဟိုတယ်က မဖွင့်ထားဘူးလေ။ ထိတဲ့ အမျိုးသမီးတွေလည်း လူလတ်ပိုင်းတွေပဲ ဖြစ်တယ်။ အခု သူတို့ကို အရေးပေါ် ဆေးကုပေးနေရတယ်” လို့ ပြောပါတယ်။
စဉ့်ကူးမြို့ဟာ တော်လှန်ရေးတပ်တွေ အလုံးစုံ ထိန်းချုပ်ထားတဲ့မြို့ ဖြစ်တာကြောင့် တိုက်ပွဲ မရှိတော့ပေမဲ့ မြို့အနှံ့မှာ တော်လှန်ရေးတပ်တွေရှိကြောင်း စစ်တပ်ဘက်က ယူဆလို့ မကြာခဏ ဗုံးကြဲတိုက်ခိုက်နေတာလို့ သူက ဆက်ပြောပါတယ်။
အလားတူ မနေ့ ဇွန်လမနက် ၈ နာရီခန့်ကလည်း တော်လှန်ရေးတပ်တွေ ထိန်းချုပ်ထားတဲ့ သပိတ်ကျင်းမြို့နယ် ၄ မိုင်ရွာကို ဗုံးကြဲတိုက်ခိုက်ခဲ့လို့ စာသင်ကျောင်းဆောင် ပျက်စီးခဲ့ပါတယ်။
ဧပြီလကနေ မေလ ၁၇ ရက်အထိ မတ္တရာ၊ စဉ့်ကူးနဲ့ သပိတ်ကျင်း စတဲ့မြိုနယ်တွေကို လေကြောင်း တိုက်ခိုက်မှု ၅၇ ကြိမ် ပြုလုပ်ခဲ့ရာ အရပ်သား ၇၂ ဦး သေဆုံးခဲ့ပြီး ၁၄၁ ဦး ဒဏ်ရာ ရခဲ့ကြောင်း မေလ ၁၇ ရက်မှာ မန္တလေး PDF ရဲ့ ထုတ်ပြန်ချက်အရ သိရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
