မြတ်နိုး၊ ဇွန်လ ၂ ရက်၊ မြစ်ကြီးနား
မြစ်ကြီးနားမှာ ဒီနေ့ ဇွန်လ ၂ ရက် မနက် ၆ နာရီခွဲ တိုင်းထွာချက်အရ ဧရာဝတီမြစ်ရေ စိုးရိမ်ရေမှတ်ထက် ၂ လက်မခန့် ကျော်လွန်နေပြီ ဖြစ်ပါတယ်။
ရေဘေးသင့် အိမ်ခြေ ၈၀၀ ကျော် ရွှေ့ပြောင်းရကြောင်း မိုးလေဝသနဲ့ ဇလဗေဒ ညွှန်ကြားမှုဦးစီးဌာနနဲ့ ကချင်ပြည်နယ်အစိုးရရဲ့ သတင်းထုတ်ပြန်ချက်အရ သိရပါတယ်။
“ရေတွေက တက်နေတာ။ မီးတွေလည်း ပျက်ကုန်ပြီ။ လောလောဆယ် ပစ္စည်းတွေကို ထပ်ခိုးပေါ်တော့ ရွှေ့ထားနေတယ်” လို့ မြစ်ကြီးနားမြို့ စီတာပူမှာ နေထိုင်တဲ့ အမျိုးသမီးတစ်ဦးက ပြောပါတယ်။
ဒီနေ့မနက် ၆ နာရီခွဲ တိုင်းထွာချက်အရ ဧရာဝတီမြစ်ရေဟာ မြစ်ကြီးနားမြို့မှာ မြို့ရဲ့ စိုးရိမ်ရေမှတ်အထက် ၂ လက်မခန့် ကျော်လွန်ရောက်ရှိနေပြီး နောက်တစ်ရက်အတွင်း ၁ ပေခွဲခန့် မြင့်တက်လာနိုင်ကာ စိုးရိမ်ရေမှတ်အထက် ဆက်ရှိနိုင်ကြောင်း မိုးလေဝသနဲ့ ဇလဗေဒ ညွှန်ကြားမှုဦးစီးဌာနက သတင်းထုတ်ပြန်ထားပါတယ်။
မြစ်ကြီးနားမြို့နယ်အတွင်းရှိ မြစ်ကမ်းအနီးနဲ့မြေနိမ့်ပိုင်းမှာ နေထိုင်သူတွေအနေနဲ့ ရေဘေးလွတ်ရာတွေဘက် ရှောင်ရှားဖို့ သတိပေး နှိုးဆော်ထားပါတယ်။
ဒီနေ့မနက် ၄ နာရီခွဲကနေ ၇ နာရီခွဲအထိ ရေ အတက်အကျ မရှိဘဲ မြစ်ရေချိန် ၁၂၀၅ စင်တီမီတာမှာ ငြိမ်နေကြောင်း မြစ်ကြီးနား မိုးလေဝသနဲ့ ဇလဗေဒ ညွှန်ကြားမှုဦးစီးဌာနမှ တာဝန်ရှိသူတစ်ဦးက လူမှုကွန်ရက်ကနေတဆင့် အသိပေးထားပါတယ်။
မြစ်ကြီးနားမြို့ မြေနိမ့်ပိုင်းရပ်ကွက်အတွင်း မြစ်ရေ ဝင်ရောက်မှုကြောင့် အိမ်ထောင်စု ၈၁၀ ဘေးကင်းရာ ရွှေ့ပြောင်းရကြောင်း ကချင်ပြည်နယ်အစိုးရဘက်က သတင်းထုတ်ပြန်ထားပါတယ်။
မေလ ၃၁ ရက် မနက်ပိုင်းကစ ဧရာဝတီမြစ်ရေအရှိန်နဲ့ မြှင့်တက်လာခဲ့ကြောင်းလည်း ဖော်ပြထားပါတယ်။
ဒီနေ့ ဇွန်လ ၂ ရက် ညနေအထိ ကချင်ပြည်နယ်မှာ နေရာကွက်ကြား မိုးကြီးနိုင်ပြီး မိုးရွာသွန်းခြင်းနဲ့အတူ လေပြင်း တိုက်ခတ်ခြင်း၊ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်း၊ မိုးသီးကြွေခြင်း ဖြစ်ပေါ်နိုင်တာကြောင့် ကြိုတင်သတိပြုဖို့ မိုးလေဝသနဲ့ဇလဗေဒ ညွှန်ကြားမှုဦးစီးဌာနက အကြံပြုထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
