ပါင်ပျော၊ ကျံရ်မေ ဆငည်း 30၊ မိုင်းဝီး
ကူန်ရဝ်မာဂါင်ကဲ က္လာင်းတဖုင်ဆျှိည်ဖီမျေဒါႈ ဒီဘိူန်းတံပ်ဆီုက်တအာင်း TNLA ကဲတထိင်ခြဲ ကပီုန်ဆျှံမ်ကဒါႇပိူည် ပလှံင်အေဲမ်ခြီရ် အရာပ်အေဲမ်ငူည်း ခေဲင်ခမိုရဝ်ပါင်ဟာင်ဒါင်းနီန် တံပ်ဆီုက်ကိုကာင် MNDAA ကဲ ရံပ်တိုည်းဟာဝ်း ကောန်အီမာည်း ရဝ်ဟိုတီး ကာည်း ရဝ်စယ်နေ 2 အီး စွဲဒါႈကဲမိုႈစိုန်အောႏ။
ကောန်အီမာည်း အ်ုန်အီဂေါည်ပရဝ်စယ်နေနီန် အူအီးက္လာင်းတဖုင်ဆျှိည်ဖီမျေဒါႈ ဘည်မိုႈဘည်ဘာည်း အ်ုန်မိုႈ ခည်ကျံရ်မေ ဆငည်း 16 ဒိူန် ဘံန်ဟောည်ႇက္လာင်း တိုအီးခေဲင်အရာပ်ကဲ တတံပ်ကိုကာင်ကဲဒါႈ ကောန်အီမာည်းဂါရ်ဒီန် စိုန်ဟာဝ်းဂါင်ရဝ်ဟိုရီး လှံင်အေဲမ်ကိုက် ကဲစီဒေဲႈတိုည်းဟာဝ်းပွံတ် ကောန်အီမာည်း 2အီးဂါရ်ဒီန် ပဂါင်အောႏ။
“ဂါရ် ဟာဝ်းတိုက်ကဆာ်ႈ ပရဝ်ဟိုရီး ဟောည်ႇဒီန် တိုအီးရဝ်ဟိုရီးကဲစီ ဟာဝ်းဟြာင်းက္လာင်းတတံပ်ကိုကာင်ကဲဒါႈ ဂါရ်စိုန်။ ကိုကာင်ကဲမာ် ဒေဲႈတိုည်းဖါ်ႈဂါရ် ပဂါင် တာင်ဟာဝ်းအူန်းဂါရ် ပလူမ်အရာပ်နံမ့်ဖကာ။ ဟောည်ႇဒီန် ဘံန်ဟာဝ်းဆမွံတ် ယာည်းတာဘြောင်ရဝ်ဟိုရီး ပဂါင်ကဲအီတာင်ဂါရ် 2အီးဒီန် တတံပ်ကိုးကာင်းကဲ ကဲစီဒါႈ ယဲအာဝ်တာင်မ”
ဂေါႇမိုႈ အ်ုန်ဆမာမိုႈ ဘည်အာဝ်လည်နောႈယေတ် တတိုအီး စီဟာဝ်းဟြာင်းက္လာင်းဘည်နီန် ဂေါႇဘည်ဒီန် စီပဲန်တိုအီးခေဲင်အရာပ်ကဲ မှာန်းကနာည်နှာင်း တံပ်ကိုးကာင်းကဲ စေတ်ကတီးကရီးဆဲ့ အမှုစိုန်လှေနီန် စီချအမိင်ကဲဒီန်အောႏ။
တိုအီးခေဲင်အရာပ်ကဲ ဘိူည်က္လာင်းဒါႈ MNDAA ကဲ စွဲဖါ်ႈကောန်အီမာည်း 2 အီးဂါရ်ဒီန် ဒါႈမိုႈစိုန် ရဲန်အူန်းကနာည်နံင်ဒဲႈ တာမ်ယံမ်းတဂါရ်မာ် ကဆီုဝ်ဖုင်ယဲဆျှိုည်ဖီမျေ ညှံမ်ဘယ်စိဒေဒါႈ ကရီးကတီးအောႏ။
ဘာည်းလိူည်ဒီန် ခည်ကျံရ်မေ ဆငည်း 5 ဒိူန်မာ် ဒီဘိူန်းတံပ်ဆီုက်တအာင်း TNLA ကဲတထိင်ခြဲ ပကပီုန်ဆျှံမ်ကဒါႇပိူည် လှံင်အေဲမ်ကိုက် အရာပ်မိုင်းစီးနီန် ကောန်ဆီုက်တံပ်ကိုကာင်ကဲ 2 အီး ကထာႇဟာဝ်းငါည် တာဥက္ကဌနမ့်မောကဲ ဘည်အာဝ်မိူဝ်ႈပ်ုန်လူည်ႇဆေ ဂဲကဲနီန်အောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဆျှိုည်ဖီမျေဂဲနီန် အာဝ်ဝံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်နီန်။
