ယာရူစိင်၊ မေလ ၃၀ ရက်၊ မင်းပြား
ရခိုင်ပြည်နယ် မင်းပြားမြို့နယ် ကြမ်းတိုက်ကျေးရွာကို အလည်လာတဲ့ ကလေးငယ် ၁ ဦး အိမ်ဘေးရှိမြောင်းထဲ ရေနစ်သေဆုံးသွားခဲ့တယ်လို့ ဖြစ်စဉ်သိရှိသူ တစ်ဦးက ရွှေဖီမြေကို ပြောပါတယ်။
မင်းပြားမြို့နယ် ကြမ်းတိုက်ကျေးရွာရှိ ဆွေမျိုးတွေထံ အလည်လာတဲ့ ကလေးငယ်ကို အိမ်မှာမတွေ့တာကြောင့် မိသားစုဝင်တွေက လိုက်ရှာပြီး ဒီနေ့ မေလ ၃၀ ရက် မနက် ၉ နာရီအချိန်မှာ အိမ်ဘေးရှိ ရေမြောင်းထဲမှာ သေဆုံးနေတာကို တွေ့ရှိခဲ့တာဘဲ ဖြစ်ပါတယ်။
“သူ့အမေက ကြမ်းတိုက်ရွာသူပါ။ သူ့အမေရဲ့ ဆွေမျိုးတွေက ရှင်ပြုပွဲ ဖိတ်ကြားထားလို့ လာလည်တာပေါ့နော်။ အခုသူအဖေလည်း မသိသေးရဘူး။ မလေးရှားနိုင်ငံမှာအလုပ်လုပ်ကိုင်နေပါတယ်။ ရေမြောင်းက အမြင့် ၄ ပေကျော်လောက်တော့ရှိတယ်။ ကလေးတစ်ယောက်ရဲ့ အရပ်နဲ့ဆိုတော့ နက်တာပေါ့နော်။ ဒီဘက်မှာကျ ဒီတလော မိုးအရမ်းရွာလို့ ရေမြောင်းလဲ ရေကြီးတာပေါ့”လို့ အထက်ပါ သတင်းအရင်းအမြစ်က ဆက်ပြောပါတယ်။
သေဆုံးသွားခဲ့ရတဲ့ ကလေးငယ်ဟာ အသက် ၅ နှစ်အရွယ် မောင်သူဟိန်းထွန်းဖြစ်ပြီး ပေါက်တောမြို့နယ် ရင်ရဲ့ကန်ကျေးရွာကနေ မင်းပြားမြို့နယ် ကြမ်းတိုက်ကျေးရွာကို မိခင်ဖြစ်သူနဲ့ အတူ အလည်လာကြတာဘဲ ဖြစ်ပါတယ်။
ပြီးခဲ့တဲ့ မေလ ၂၁ ရက်ကလဲ စစ်တွေမြို့နယ် သင်းပုန်းတန်းကျေးရွာကနေ ရသေ့တောင်မြို့နယ် ချိန်ခါလီကျေးရွာကို စစ်ရှောင်လာတဲ့ အမျိုးသမီးငယ် ၄ ဦးဟာ ရေချိုးဖို့ ရေမြောင်းထဲကို ရေဆင်းချိုးရာကနေ ရေနစ်သေဆုံးသွားခဲ့တာဘဲ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
