အိုက်ပွီး၊ မေလ ၂၉ ရက်၊ ရခိုင်
အာရက္ခတပ်တော် (AA) က ဖမ်းဆီးထားပြီး စစ်သင်တန်းသို့ ပို့ဆောင်ထားတဲ့ ချင်းလူငယ် ၆၀ ဦးကို ပြန်လွတ်ပေးဖို့ ရခိုင်ပြည်နယ်အခြေစိုက် ချင်းနိုင်ငံရေးဦးဆောင်ကော်မတီ (CPSC) က မနေ့ မေလ ၂၈ ရက်နေ့မှာ တောင်းဆိုလိုက်ပါတယ်။
ဖမ်းဆီးခံရသူတွေဟာ မြေပုံမြို့နယ်နဲ့ မင်းပြားမြို့နယ်တွေက ချင်းလူငယ်တွေဖြစ်ပြီး ပြည်မသို့ ကျောင်းတက်ဖို့နဲ့ မိသားစု စားဝတ်နေရေးအတွက် အလုပ်လုပ်ကိုင်ဖို့ သွားရောက်စဥ် အမ်းမြို့နယ်ထဲက AA ရဲ့ စစ်ဆေးရေးဂိတ်မှာ ဖမ်းဆီးခံရတာဖြစ်ပါတယ်။
“ဒီလထဲမှာပဲ ဖမ်းဆီးခံရတာပါ။ မြေပုံမြို့နယ်က အများစုပါတယ်။ သူတို့က ရွာမှာကျောင်းမဖွင့်လို့ ပြည်မဘက်ကို ကျောင်းတက်ဖို့သွားကြသူတွေနဲ့ ရွာမှာအလုပ်အကိုင်မရှိလို့ မိသားစုစားဝတ်နေရေးအတွက် ပြည်မဘက် အလုပ်လုပ်ဖို့ သွားကြသူတွေပါ။”လို့ ဖမ်းဆီးခံရတဲ့ မိသားစုဝင်တစ်ဦးက ရွှေဖီမြေသို့ ပြောပါတယ်။
ဖမ်းဆီးခံရသူတွေထဲမှာ အသက်မပြည့်သေးတဲ့ လူငယ်တွေအများအပြားပါဝင်ပြီး ၎င်းတို့ဟာ ဖမ်းဆီးခံရကတည်းက မည်သည့်အဆက်အသွယ် မရရှိသလို့ တွေ့ခွင့်လည်း မရရှိတဲ့အတွက် မိသားစုဝင်တွေက စိုးရိမ်နေကြပါတယ်။
“ဖမ်းဆီးထိန်းသိမ်းထားတဲ့ နေရာကိုတော့ သိပါတယ်။ တွေ့ခွင့်ရဖို့ တောင်းတယ်။ AA က တွေ့ခွင့်မပေးဘူး။ စစ်သင်တန်းပို့မယ်ကြားတယ်။ အသက်မပြည့်တဲ့သူတွေလည်းပါဝင်တဲ့အတွက် စစ်သင်တန်းတက်ခိုင်းမယ်ဆိုတော့ မိသားစုဝင်တွေက စိုးရိမ်နေကြတယ်။”လို့ ဖမ်းဆီးခံရတဲ့မိသားစုဝင်တစ်ဦးက ရွှေဖီမြေသို့ ပြောပါတယ်။
ULA/AA က အမျိုးသားကာကွယ်ရေးဆိုင်ရာ အရေးပေါ် ပြဌာန်းချက် (NDEP) ကို ပြီးခဲ့တဲ့ မေလ ၁၈ရက်နေ့က ထုတ်ပြန်ပြီး အမျိုးသား ၁၈ နှစ်မှ ၄၅ နှစ်အတွင်း၊ အမျိုးသမီး ၁၈ နှစ်မှ ၂၅ နှစ်တွင်း ရခိုင်ပြည်နယ်မှ ပြည်မသို့ ထွက်ခွာဖို့ တားမြစ်ထားပါတယ်။
NDEP ကို ရက္ခိုင်ဒေသက လူမျိုးစုတိုင်းနဲ့ သက်ဆိုင်တဲ့အတွက် ဌာနေချင်းလူမျိုးစုတွေကို အသိမှတ်ပြု တန်ဖိုးထားတဲ့အနေနဲ့ ဌာနေချင်းနိုင်ငံရေးအင်အားစုတွေနဲ့ ကြိုတင်ညှိနှိုင်းမှုတွေ ပြုလုပ်သင့်တယ်လို့ CPSC က ဆိုပါတယ်။
အပြန်အလှန် တန်ဖိုးထားမူ၊ အသိမှတ်ပြုမူသည် တိုင်းပြည်ကြန်အင်လက္ခာဏာတည်ဆောက်ရာမှာ အရေးကြီးတယ်လို့ ဆိုပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
