မြတ်နိုး၊ မေ ၂၈၊ ဖားကန့်
ကချင်ပြည်နယ်၊ မိုးညှင်းခရိုင်၊ ဖားကန့်မြို့နယ်၊ လုံးခင်းကျေးရွာအုပ်စု၊ လယ်ပြင်ဘက်မှာ မနေ့ မေလ ၂၇ ရက်နေ့ ညပိုင်းကစ တိုက်ပွဲ အပြင်းအထန်ဖြစ်ပွားလာကြောင်း ဒေသခံတွေဆီက သိရပါတယ်။
“မနေ့ညကတည်းက လယ်ပြင်ဘက် အသံကြားနေရတယ်။ ကျနော်တို့ဘက်တော့ ဘာမှ မဖြစ်ဘူး။ မနေ့ည ပြေးနေကြတဲ့ ပုံက ကျောက်ဝိုင်းဘက်ကပါ။ လုံးခင်း ကျောက်ဝိုင်းက လူတွေပါ။ လုံးခင်းဘက် စစ်ကောင်စီတွေ ရှိပါတယ်။ အရင်ကတည်းက အကုန်မသိမ်းနိုင်သေးဘူးလေ။” လို့ ဒေသခံ လူငယ် တစ်ဦးက ပြောပါတယ်။
အခြေအနေအရ တိုက်ပွဲတွေ ဆက်ဖြစ်လာနိုင်တယ်လို့ သူက ဆိုပါတယ်။
“တိုက်ပွဲက လုံးခင်းအနီးက လယ်ပြင်မှာလို့ပြောတယ်။ လုံးခင်းဘက် လက်ထောက်တွေနဲ့တော့ ပစ်တာ ရှိတယ်လို့ ပြောတယ်။ လုံးခင်းမြို့ထဲတော့ တိုက်ပွဲ ဝင်တာမျိုး မရှိသေးဘူး။ နေ့လယ်တုန်းကတော့ ခဏ ပစ်သံ ကြားရတာပဲ ဟုတ်တယ်။ အဲတာ လယ်ပြင် စစ်တပ်ကုန်းက စစ်ကောင်စီတွေထွက်လာလို့ PDF တပ်ဖွဲ့က နည်းနည်း ပစ်လိုက်တာလို့ ပြောတယ်။” လို့ ရှေ့တန်းနဲ့ နီးစပ်သူ တစ်ဦးက ပြောပါတယ်။
စစ်ကောင်စီတွေက ကံဆီး နဲ့ ဆိုင်းတောင် ဘက်ကရော သုံးနေရာက ဆင်းလာပြီး လာကြိုဖို့ ပြင်ဆင်နေကြပေမယ့် အဆင်မပြေလို့ လယ်ပြင်ဘက်က ယမ်းချက်စက်ရုံဘက်ပဲ ပြန်ဝင်သွားတယ်လို့ကြားနေတယ်လို့ သူက ပြောပါတယ်။
စစ်ကောင်စီတွေက ပြီးခဲ့တဲ့ ဧပြီလ ကုန်ပိုင်းကစ မြစ်ကြီးနားဘက်ကနေ ဖားကန့်ဘက် အင်အား ၆၀၀ ခန့် လမ်းကြောင်း သုံးကြောင်း နဲ့ စစ်ကြောင်းထိုးလာတာ ဖြစ်ပါတယ်။
လမ်းကြောင်း တလျှောက်မှာ အင်အား ၃၀၀ ခန့် နေရာခွဲခန့်ချထားခဲ့သလို ထိခိုက် ဒဏ်ရာရနဲ့ သေဆုံးသူ ၁၀၀ နီးပါးရှိကာ လယ်ပြင်ဘက်တော့ အင်အား ၂၀၀ ဝန်းကျင် ရောက်ရှိလာတယ်လို့ သိရကြောင်း ရှေ့တနါးနဲ့ နီးစပ်သူတွေဆီက သိရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
