ဆျှိုည်ဖီမျေ၊ ကျံရ်မေ ဆငည်း 27
ကညာအာဏာဆီုက်ဇေဝ်ကဲ ရိူဝ်ႈလေႈပ္လါႇဘေဲႇပဇံင်းဒါႈ ခိင်ရောတ် မီန်းအံင်လဴင် အ်ုန်အီမိုႈ အီအွံရ်ဆီုက် ပတီုင်ကပ္လိူင် တြိဂံဒေသတိုင်း အီဂေါည်ပကီုင်းကျိုင်းတုံ ကပီုန်ဆျှံမ်ကဒါႇလေႈဆာင်ငည်းနီန် အ်ုန်ဟာဝ်းကတူႈကငျားတောပ် ဉီးစန်ပေ့ အ်ုန်အီမိုႈ ဒုဉက္လဌ NDAA နီန်အောႏ။
ခည်ကျံရ်မေ ဆငည်း 25ဒိူန် အီအွံရ်ဆီုက် မီန်းအံင်လဴင်၊ NDAA ကာည်း ဖုင်က်ုရ်ရံရ် လံပ်ယေန်ငံင် ပ်ုန်အွံရ်ဒုဉက္ကဌဉီးစန်ပေ့ကဲ ကတူႈကငျား ခေဲင်တီုင်ကပ္လိူင် တြိဂံသေဒတိုင်းနီန်အောႏ။
ကဲပ္လိူရ်ႈအူန်း ခေဲင်ပ္လါႇဘေဲႇပ်ုန် ရိူဝ်ႈလေႈကဲဒါႈ ခေဲင်ကတူကငျားကဲဒီန် အာဝ်မိူဝ်ႈမ ဘည်ရံပ်ခါမ်အူန်း ကဒါႇ NDAA ကဲ တဖုင်လံပ်အရေးတီုင်ကုင် ပအရာပ်မိူင်းလားနီန်၊ ကဲကမိုန်ဒေဲႈဒါႈ နံင်ကပိုမ်ရေဲန်ဟာဝ်း ကနာည်လံပ်ဇံင်းမံင်ကုင်ကာည်း ခေဲင်အရာပ်အရာနီန်အောႏ။
ဆဲႈဒါႇဒီန် ကဲဒါႈ မီန်းအံင်လဴင် ဒါႈနံင်ကပိုမ်ရေဲန်ဟာဝ်း လံပ်ခေါခါႇကာည်း လံပ်ပိင်ငျာ တောပ်ဘည်ဘ္လံက်ရဇံင်းကာည်း အဆိုးယနီန် ပအရာပ်မိူင်းလားအောႏ။
ဘံန်ဟောည်ႇဆီမ်းဟာဝ်းအာဏာ တံပ်မိူင်းလား NDAA ကဲနီန် ဂေါည်ဂေါည်ကတူႈကငျားဖါ်ႈ တောပ်ကညာအာဏာဆီုက်ဇေဝ် ဆဲႈဒါႇဒီန် အ်ုန်မိုႈဖုင်အီ က္လာင်းအူန်းဒါႈ ကဲဘားဒါဘ္လံက်ရဇံင်း အာဝ်မိူဝ်ႈငါည်ဒဲႇငါည်ဒါင်း တအရေးကုင်ကပိုမ်ဘြာန်နီန်အောႏ။
ဖုင်တံပ်မိူင်းလား NDAA နီန် ကဲဇံင်းဒါ့်ဖါ်ႈ လံပ်ကတီုက်ကပဴင်တောပ် အဆိုးယဆီုက်ကဲ ခည်ဆန်ုမ် 1989 ဒိူန် ကဲအူပ်ဘြောင်ဖါ်ႈ ဒဲႈ မိူင်းလား၊ ဆီလူ၊ အရာပ်နံမ့်ပါန်ကဲနီန် ပဲန်အရာပ် – 4အောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဆျှိုည်ဖီမျေဂဲနီန် အာဝ်ဝံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်နီန်။
