ပို့လဘား၊ မေလ ၂၇ ရက်၊ မိုင်းငေါ့
တအာင်းတပ်မတော်- TNLA ထိန်းချုပ်ထားတဲ့ မိုင်းငေါ့မြို့ထဲက ရှမ်းပြည်တိုးတက်ရေးပါတီ- SSPP ရဲ့ ရွှေတူးဖော်မှုကို ဒေသခံတွေ ကန့်ကွက်နေကြပါတယ်။
မိုင်းငေါ့မြို့ ကွမ်းစလန်း၊ နမ့်တွေနဲ့ ချုံအုပ်စုမှာ SSPP က ဒေသခံတွေရဲ့ ခွင့်ပြုချက်မရဘဲ ရွှေတူးဖော်နေတာကြောင့် သဘာဝပတ်ဝန်းကျင် ပျက်စီးမှာကို စိုးရိမ်တာအပြင် TNLA နဲ့ SSPP ကြား အငြင်းပွားပြီး ပြဿနာ ဖြစ်လာမှာကိုလည်း စိုးရိမ်တာကြောင့် ရွှေ တူးဖော်မှုကို ကန့်ကွက်နေကြတာ ဖြစ်ပါတယ်။
“ဒေသခံတွေ လာကန့်ကွက်တယ် သူတို့ကလည်း ဆက်လုပ်မယ်။ ဒေသခံတွေရဲ့ စကားကို နားမထောင်ဘူး။ စစ်တပ်အချင်းချင်းပြောမှ လက်ခံမယ်ဆိုတဲ့ပုံစံမျိုး ဖြစ်နေတယ်။ ဒေသခံတွေက ဘယ်အဖွဲ့ပဲဖြစ်ဖြစ် အဲလိုလုပ်ရင် ကန့်ကွက်ကြမှာပဲ။ အရင်နှစ်တွေက TNLA လက်အောက်ခံတွေ တူးတာရှိတယ်။ အဲဟာလည်း ကန့်ကွက်လာခဲ့တယ်။ သူတို့မတူးတော့ဘူး၊ အခုကျ SSPP တွေ လာတူးနေကြတာ။ ချောင်းတွေလည်း ဘာမှရစရာမရှိတော့ဘူး” လို့ ဒေသခံတစ်ဦးက ပြောပါတယ်။
မိုင်းငေါ့မြို့မှာရှိတဲ့ မိုင်းငေါ့ချောင်းနဲ့ နမ့်မချောင်းမှာလည်း ရွှေတူးဖော်တာကို ဒေသခံတွေ ကန်ကွက်နေပေမဲ့ လက်ရှိအချိန်ထိ SSPP က တူးဖော်တာတွေ ဆက်လုပ်နေဆဲဖြစ်တယ်လို့ ပြောပါတယ်။
မိုင်းငေါ့မှာ တခြားအဖွဲ့အစည်းတွေလည်း ရွှေတူးဖော်မှု အလွန်အကျွံ လုပ်နေတာကြောင့် ချောင်းရေ နေ့စဉ် ညစ်ညမ်းနေပြီး သဘာဝပတ်ဝန်းကျင်လည်း ထိခိုက်လာနိုင်ဖွယ် ရှိနေပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
