မိုင်းရူပ၊ မေလ ၂၇ ရက်၊ မိုးကုတ်
မန္တလေးတိုင်း မိုးကုတ်မြို့မှာ ဓားပြတိုက်ဖို့ ကြံစည်နေသူ အမျိုးသား ၃ ဦးကို တအာင်းတပ်မတော် PSLF/ TNLA ရဲ့ ရဲတပ်ဖွဲ့တွေက ဖမ်းဆီးရမိခဲ့ပါတယ်။
ပြီးခဲ့တဲ့ မေလ ၂၃ ရက်မှာ မိုးကုတ်မြို့အရှေ့ပိုင်း မိုးကုတ်ကြယ်ကားဂိတ်အနီးက လက်ပစ်ဗုံး ပေါက်ကွဲမှု ဖြစ်ပွားခဲ့ပြီးနောက် တအာင်းတပ်ရဲတပ်ဖွဲ့က စစ်ဆေးနေစဥ် ဓားပြတိုက်ဖို့ ကြံစည်နေသူ အမျိုးသား ၃ ဦးကိုပါ သေနတ်တွေနဲ့အတူ ဖမ်းဆီးရမိခဲ့တာ ဖြစ်ပါတယ်။
ကိုသူရမျိုးထက်၊ ကိုအောင်ရှင်သန့်နဲ့ ကိုနေမျိုးသူဆိုသူတို့ကို ဖမ်းဆီးမိတာဖြစ်ပြီး ၎င်းတို့နဲ့အတူ လက်လုပ်သေနတ် (၁) လက်၊ လက်ကိုင် ဓားမြောင် (၄) လက်၊ ပစ္စတို (၁) လက်နဲ့ ယာမဆေးပြား (၅၀) ပြား သိမ်းဆည်းရမိခဲ့တယ်လို့ TNLA က ထုတ်ပြန်ပါတယ်။
“ဓားပြတိုက်ဖို့ ကြံစည်နေတဲ့အချိန်မှာ ရဲတပ်ဖွဲ့တွေက မိုးကုတ်မြို့အနောက်ပိုင်းမှာ ဖမ်းမိတာ။ ၃ ယောက်လုံး အမျိုးသားတွေပဲ” လို့ မိုးကုတ်မြို့ရှိ သတင်းအရင်းအမြစ်တစ်ဦးက ရွှေဖီမြေကို ပြောပါတယ်။
တအာင်းတပ်ထိန်းချုပ်ထားတဲ့ မိုးကုတ်မြို့မှာ ဓားပြတိုက်မှုတွေ၊ ဗုံးဖောက်ခွဲမှုတွေ မကြာခဏဖြစ်ပွားနေပြီး ဖမ်းဆီးရမိသူ ၃ ဦးကို အရင်ဓားပြတိုက်မှုတွေနဲ့ ခိုးမှုတွေမှာ ပါဝင်ခဲ့ခြင်းရှိမရှိ တအာင်းတပ်ရဲဖွဲ့က ဆက်လက်စုံစမ်းနေဆဲလို့ သိရပါတယ်။
ပြီးခဲ့တဲ့ မေလ ၂၃ ရက်မှာ မိုးကုတ်မြို့ ရှော့လီဝိုင်းအုပ်စု ကန်တော်ရပ်ကွက်မှာ အမည်မသိ အမျိုးသားနှစ်ဦးက ဆိုင်ကယ်စီးလာပြီး လက်ပစ်ဗုံး လာရောက်ပစ်ခတ်ခဲ့ရာ ဒဏ်ရာရသူ ၆ ဦးအထိ ရှိခဲ့ပါတယ်။
ဒါ့အပြင် ပြီးခဲ့တဲ့ မေလ ၁၂ ရက်မှာလည်း မိုးကုတ်မြို့ အရှေ့ပိုင်းမှာ လုံခြုံရေး ကင်းလှည့်နေတဲ့ တအာင်းရဲတပ်ဖွဲ့တွေ ပစ်ခတ်ခံခဲ့ရပါတယ်။
လက်ရှိမှာ မိုးကုတ်မြို့အတွင်း ဓားပြတိုက်မှု၊ ခိုးမှုနဲ့ ဗုံးဖောက်ခွဲမှု ပြုလုပ်သူတွေကို TNLA က ဆက်လက်ရှာဖွေနေပြီး ပြစ်မှုကျူးလွန်သူတချို့ မန္တလေးဘက်သို့ ထွက်ပြေးလွတ်မြောက်နေတယ်လို့ မိုးကုတ်ရဲတပ်ဖွဲ့နဲ့ နီးစပ်သူတစ်ဦးက ရွှေဖီမြေကို ပြောပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
