ခိုင်လေး၊ မေလ ၂၆ ရက်၊ ကျောက်ထု
မကွေးတိုင်း ဂန့်ဂေါခရိုင် ဆောမြို့နယ်က ကျောက်ထုတိုက်နယ် ကျောက်ထုရွာမှာ ကိုယ်ဝန် ၅ လ လွယ်ထားတဲ့ အမျိုးသမီးတစ်ဦးကို စစ်ကြောင်းထိုးလာတဲ့ စစ်ကောင်စီတပ်သားတွေက အဓမ္မပြုကျင့်ပြီး သတ်ဖြတ်ခဲ့တယ်လို့ ယောဒေသခံ တစ်ဦးက ရွှေဖီမြေကို ပြောပါတယ်။
အသက် ၂၆ နှစ်အရွယ် ကိုယ်ဝန် ၅ လ လွယ်ထားတဲ့ အမျိုးသမီးကို အဓမ္မပြုကျင့်သတ်ဖြတ်သွားတဲ့ စစ်ကောင်စီတပ်သားတွေဟာ ကျောက်ထုမြို့နယ် အမှတ် (၃၆၈) အမြှောက်ရင်းက တပ်ဖွဲ့ဝင်တွေ ဖြစ်တယ်လို့ ဆိုပါတယ်။
”ကျောက်ထုမှာဖြစ်တာ။ အဲဘက်မှာ ကျောက်ထုအမြှောက်ရင်းက စစ်ကြောင်းထိုးနေတယ်။ ၃၆၈ အမြှောက်တပ်ရင်းက ကျူးလွန်တာပါ။ အသက် ၂၆ ကိုယ်ဝန် ၅ လ။ သေနတ်ဒဏ်ရာတွေ့သလို လှည်ပင်းလှီးဖြတ်ထားတာလည်း တွေ့ရပါတယ်။ အမျိုးတွေစီ သွားတာဗျ စစ်ဘေးရှောင်ပါ။ တစ်ယောက်ထဲပါ ခြေလျှင်တောလမ်းကနေ သွားတာပါ”
ထီးလင်းမြို့ ညောင်ကန်ကနေ ကျောက်ထုက ကံကြီးရွာအသွားမှာ ၂၃ ရက်နေ့က ပျောက်ဆုံးခဲ့တာဖြစ်ကာ ၎င်းရဲ့ ရုပ်အလောင်းကို မနေ့ ၂၅ ရက်နေ့မှာ တွေ့ရှိခဲ့တာဖြစ်ပြီး ခန့်မှန်းချက်အရ ၎င်းအမျိုးသမီးက ပြီးခဲ့တဲ့ ၂၃ ရက်နေ့ကတည်းကသေဆုံးခဲ့တာဖြစ်တယ်လို့ ဆိုပါတယ်။
ပြီးခဲ့တဲ့ မေလ ၁၂ ရက်နေ့ ကလည်း ဂန့်ဂေါအခြေစိုက် စစ်ကောင်စီ ခမရ ၅၀ တပ်ရင်းနဲ့ အမြှောက်ရင်းတို့က ဂန့်ဂေါမြို့နယ်၊ လယ်မရွာဘက်ကို စစ်ကြောင်းထိုး ဝင်ရောက်လာပြီး ကလေး ၄ ဦးအပါအဝင် အရပ်သား ၁၁ ဦးကို သတ်ဖြတ်ပြီး ၁၁ ဦးကို ဖမ်းဆီးခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
