အိုက်ပွီး၊ မေလ ၂၆ ရက်၊ တောင်ကုတ်
ရခိုင်ပြည်နယ်တောင်ပိုင်း၊ တောင်ကုတ်မြို့နယ်မှာ အာရက္ခတပ်တော်(AA) ရဲ့ စစ်မှုထမ်းကိစ္စ ဆန္ဒပြတဲ့ အရပ်သား ၅၀ ကျော် ဖမ်းဆီးထိန်းသိမ်းခံရပြီး တစ်ပတ်အကြာထိ ပြန်မလွတ်ပေးသေးဘူးလို့ ဒေသခံတစ်ဦးက ရွှေဖီမြေသို့ ပြောပါတယ်။
ပြီးခဲ့တဲ့ မေလ ၁၈ ရက်နေ့က တောင်ကုတ်မြို့နယ်၊ ကံပြင်၊ သကယ်ကျွန်း၊ ဆားပြင်၊ တန်းလွဲရွာမ၊ ကင်းတောင်ရွာ၊ လမို့မော်ရွာ စတဲ့ကျေးရွာဒေသခံပြည်သူတွေဟာ AA ရဲ့ စစ်မှုထမ်းကိစ္စကို ကန့်ကွက်ဆန္ဒပြခဲ့ကြတာဖြစ်ပါတယ်။
“ရွာသားတွေက စစ်မှုထမ်းကိစ္စ ငြိမ်းချမ်းစွာ ကန့်ကွက် ဆန္ဒဖော်ထုတ်နေကြတာပါ။ အဲဒါကို AA ဘက်ကနေပြီး သေနတ်ပစ်ဖောက် လူစုခွဲခိုင်းပြီး အရပ်သား ၅၀ ကျော်ကို ဖမ်းဆီးခေါ်ဆောင်သွားပါတယ်။ သူတို့တွေကို ဒီကနေ့ထိ ပြန်မလွတ်ပေးသေးဘူး။”လို့ တောင်ကုတ်ဒေသခံတစ်ဦးက ရွှေဖီမြေသို့ ပြောပါတယ်။
ဖမ်းဆီးခံရသူတွေဟာ မိသားစုဝင်တွေနဲ့ တွေ့ဆုံခွင့်၊ ထောင်ဝင်စာပို့ခွင့် မရရှိခဲ့တဲ့အပြင် လာရောက်တွေ့ဆုံသူတွေပါ AA တပ်ဖွဲ့ဝင်တွေက ခြိမ်းခြောက်တာတွေ ရှိနေတယ်လို့ ဆိုပါတယ်။
“ဖမ်းဆီးထားတဲ့သူတွေကို ဘယ်မှာထားလဲဆိုတာ နေရာ သိတယ်။ သွားတွေ့တယ်။ တွေ့ခွင့် မရဘူး။ အမှန်ဆို တွေ့ခွင့်ရရမယ်။ ထောင်ဝင်စာ ပို့လို့ရ ရမယ်။ အခုလာတွေ့တဲ့သူကို ခြိမ်းခြောက်ပြီး ပြန်လွတ်တယ်။ ဒါ လုံးဝ မဖြစ်သင့်ဘူး။”လို့ တောင်ကုတ်မြို့နယ်ဒေသခံတစ်ဦးက ရွှေဖီမြေသို့ ပြောပါတယ်။
ဖမ်းခံရသူတွေထဲမှာ လူငယ်မိဘတွေ၊ အသက်ကြီးပိုင်းတွေအများစုဖြစ်ပြီး လူငယ်တွေလည်း ပါတယ်လို့ သိရပါတယ်။
ပြီးခဲ့တဲ့ မေလအစောပိုင်းက တောင်ကုတ်မြို့နယ်က ကျေးရွာတွေမှာ AA တာဝန်ခံတွေက ရောက်ရှိလာပြီး လူငယ်တွေကို စစ်မှုထမ်းဖို့ ခေါ်ဆောင်နေတာကြောင့် ရွာသားတွေက ကန့်ကွက် ဆန္ဒပြနေကြတာဖြစ်ပါတယ်။
ရခိုင်ပြည်နယ်က အမျိုးသား အသက် ၁၈ နှစ် မှ ၄၅ နှစ်အထိ၊ အမျိုးသမီးဆိုပါက အသက် ၁၈ နှစ်မှ ၂၅ နှစ်အတွင်း စစ်မှုထမ်းအကျုံးဝင်သူတွေကို ပြင်ပထွက်ခွာခွင့် ကန့်သတ်ကြောင်း AA က မေလ ၂၂ ရက်နေ့က ထုတ်ပြန်ထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
