ရွှေဖီမြေ၊ မေလ ၂၆ ရက်
ရှမ်းအရှေ့ ကျိုင်းတုံမြို့ရှိ စစ်ကောင်စီရဲ့ တြိဂံဒေသတိုင်း စစ်ဌာနချုပ်ကို စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင် ရောက်ရှိနေချိန် အမျိုးသားဒီမိုကရက်တစ်မဟာမိတ်တပ်-NDAA ဒုဥက္ကဌ ဦးစန်ပေ့နဲ့ တွေ့ဆုံခဲ့ကြောင်း စစ်ကောင်စီက သတင်းထုတ်ပြန်ပါတယ်။
မနေ့ မေလ ၂၅ ရက်မှာ စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်နဲ့ NDAA နဲ့ ဒုတိယဥက္ကဋ္ဌ ဦးစန်ပေ့ ဦးဆောင်တဲ့ ငြိမ်းချမ်းရေး ကိုယ်စားလှယ်အဖွဲ့တို့ တြိဂံဒေသတိုင်း စစ်ဌာနချုပ်အတွင်း တွေ့ဆုံခဲ့ကြပါတယ်။
တွေ့ဆုံမှုအတွင်း NDAA ဘက်က မိုင်းလားဒေသမှာ ဘယ်နိုင်ငံရေးအဖွဲ့ကိုမှ လက်ခံထားတာမရှိဘဲ ဒေသတွင်းနဲ့ နိုင်ငံတော်တည်ငြိမ်ရေးအတွက် ပူးပေါင်းဆောင်ရွက်သွားမယ်လို့ ဆွေးနွေးခဲ့ကြောင်း စစ်ကောင်စီရဲ့ ထုတ်ပြန်ချက်ထဲ ဖော်ပြပါတယ်။
ဒါ့အပြင် စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က မိုင်းလားဒေသမှာ အစိုးရနဲ့မူဝါဒအတိုင်း ပညာရေးနဲ့ ကျန်းမာရေးကဏ္ဍတွေမှာ ပူးပေါင်းဆောင်ရွက်မယ်လို့ ပြောကြားခဲ့တယ်လို့ ဆိုပါတယ်။
မိုင်းလားတပ် NDAA ဟာ စစ်တပ်အာဏာသိမ်းပြီးနောက် စစ်ကောင်စီနဲ့ မကြာခဏတွေ့ဆုံတာတွေ ပြုလုပ်ခဲ့ပြီး မြန်မာပြည်တွင်းရေးမှာ ဘက်မလိုက်တဲ့မူကို ကိုင်စွဲထားတယ်လို့ ထုတ်ပြောထားတဲ့ အဖွဲ့ဖြစ်ပါတယ်။
မိုင်းလားတပ်ဖွဲ့ NDAA ဟာ လွန်ခဲ့တဲ့ ၁၉၈၉ ခုနှစ်မှာ စစ်အစိုးရနဲ့ အပစ်ရပ်ခဲ့ပြီး မိုင်းလား၊ ဆီလူး၊ နမ့်ပန်းဒေသတွေကို အထူးဒေသ-၄ အဖြစ် အုပ်ချုပ်နေတာ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
