မြတ်နိုး၊ မေလ ၂၅ ရက်၊ လိုင်ဇာ
ကချင်တပ်မတော်- KIA ထိန်းချုပ်ထားတဲ့ လိုင်ဇာ အုပ်ချုပ်ရေးနယ်မြေအတွင်း ဖွင့်လှစ်ထားတဲ့ KTV ဆိုင်နဲ့ Melody ဆိုင်အားလုံး လက်ရှိအခြေအနေပေါ် မူတည်ပြီး ရက်အကန့်အသတ်မရှိ ပိတ်ထားဖို့ KIO အုပ်ချုပ်ရေးဌာနက အသိပေးကြေညာစာ ထုတ်ပြန်ထားပါတယ်။
“ဘာကြောင့် ပိတ်ရတာလဲဆိုတော့ လက်ရှိ ကချင်ဒေသရဲ့ နိုင်ငံရေးအခြေအနေကြောင့်ပါ။ ရှင်းပြရရင် အရမ်းရှည်လို့ အတိုချုပ်ကတော့ အဲဒါကြောင့်ပါပဲ” လို့ လိုင်ဇာရှိ ဒေသခံတစ်ဦးက ရွှေဖီမြေကို ပြောပါတယ်။
မေလ ၂၄ ရက်ကစ KTV ဆိုင်နဲ့ Melody ဆိုင်တွေကို ပိတ်ထားဖို့ တရားဝင် အသိပေးထားပြီး ဆိုင်ပိတ်ထားဖို့ ကြေညာထားတဲ့ ကာလအတွင်း ဆိုင်ဖွင့်တာ၊ သတ်မှတ်ချက် စည်းကမ်း ချိုးဖောက်တာရှိရင် ပြင်းပြင်းထန်ထန် အရေးယူသွားမှာဖြစ်ကြောင်း ကြေညာချက်မှာ ဖော်ပြထားပါတယ်။
KTV ဆိုင်နဲ့ Melody ဆိုင်တွေ ပြန်လည် ဖွင့်လှစ်လို့ရမယ့် အခြေအနေရောက်ရင် မြို့နယ် အုပ်ချုပ်ရေးရုံးကနေ အသိပေးသွားမှာဖြစ်ကြောင်း ဖော်ပြထားပါတယ်။
စစ်ကောင်စီတပ်ကတော့ ဒီရက်ပိုင်းအတွင်း KIA နဲ့ ပူးပေါင်းတပ်ဖွဲ့ ထိန်းချုပ်ထားတဲ့ ကချင်ပြည်နယ် ဖားကန့်လမ်းပိုင်းနဲ့ ဝိုင်းမော်မြို့နယ်မှာ ဆက်တိုက် ထိုးစစ်ဆင်နေသလို ဗန်းမော်မြို့သိမ်းတိုက်ပွဲလည်း ဆက်လက် ပြင်းထန်နေဆဲ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
