ခိုင်လေး၊ မေလ ၂၄ ရက်၊ မင်းကင်း
စစ်ကိုင်းတိုင်း၊ မင်းကင်းမြို့နယ်က သာစည်ရွာနဲ့ မင်းစုရွာကို စစ်ကောင်စီတပ်က တိုက်ပွဲဖြစ်ပွါးတာမရှိဘဲ လေကြောင်းကနေ ပေါင် ၃၀၀ ဗုံး ကြဲချတိုက်ခိုက်ခဲ့တာကြောင့် ကလေးငယ်တွေ အပါအဝင် ဒေသခံ ၁၇ ဦး သေဆုံးပြီး ၂၀ ဦး ဒဏ်ရာရခဲ့ပါတယ်။
မနေ့ မေလ ၂၃ ရက် နေ့လယ်၂ နာရီ ၄၅ မိနစ်ခန့်က တော်လှန်ရေးတပ်ဖွဲ့တွေ ထိန်းချုပ်ထားတဲ့ သာစည်ရွာနဲ့ မင်းစုရွာကို စစ်တပ်က လေကြောင်းနဲ့ ဗုံးကြဲတိုက်ခိုက်ခဲ့တာဖြစ်တယ်လို့ စစ်ကိုင်း ဖိုရမ်ဖက်ဒရေးရှင်း ဒုဥက္ကဌက ရွှေဖီမြေကိုပြောပါတယ်။
”မင်းစုနဲ့ သာစည်ဆိုတဲ့ ရွာနှစ်ရွာကို ရှေ့ဆင့် နောက်ဆင့်ဘဲ ဗုံးကြဲတယ်။ ကလေးငယ် အပါ ၁၇ ယောက်သေတယ်။ ဒဏ်ရာရတာက ၂၀ လောက်ရှိမယ်။ ပေါင် ၃၀၀ ဗုံး ပတ်ချာလည်တော့ ဖြစ်ဖို့များတယ်။ ၅၀၀ တော့မဟုတ်ဘူး။ တိုက်ပွဲဖြစ်တာလဲ မရှိဘူး။ အဲရွာမှာက လုပ်ငန်းလုပ်နေတဲ့ ချိန်ဆိုတော့ လူစုရုံးတာတွေတော့ ရှိတယ်”လို့ ဆိုပါတယ်။
ပြီးခဲ့တဲ့ မေလ၂၂ ရက်နေ့ကလည်း စစ်ကောင်စီတပ်က မုံရွာမြို့ အထိုင်စခန်းကနေပြီးတော့ ကျေးရွာတွေဘက်ကို လက်နက်ကြီးနဲ့ ထုတာတွေ လေကြောင်းနဲ့ တိုက်ခိုက်တာတွေပြုလုပ်ခဲ့တာကြောင့် နဂါးတွင်းက ဒေသခံ အမျိုးသမီး ၁ ဦးနဲ့ အမျိုးသား ၁ ဦး သေဆုံးကာ ၁၂ ဦး ဒဏ်ရာရ ခဲ့တယ်လို့ မုံရွာဒေသခံ တစ်ဦးက ရွှေဖီမြေကိုပြောပါတယ်။
”ကျား ၁ မ ၁ ပြည်သူ ၁၂ဦး နဲ့ အိမ်မွေးတရိစ္ဆာန်တွေပါ ထိတယ်။ ချောင်းဦးနယ်ဘက်မှာလည်း တောက်လျှောက်ထုနေတာ။ ၁၅ ရက်နေ့ညက ထုတာနေအိမ်တွေကော မီးလောင် အသေအပျောက်က ၅ ယောက်။နေအိမ်က ၁၀ လုံးဗျ။ ကိုရင်ငယ်လေး ၁ပါးပါတယ်။ မိသားစုလိုက် မီးလောင်ပြီး ပွဲချင်းပြီးသေတာပါဗျ”လို့ ဆိုပါတယ်။
ပြီးခဲ့တဲ့ မေလ ၁၂ ရက်နေ့က ဒီပဲယင်းမြို့နယ် အိုးထိမ်းကွင်းရွာက စာသင်ကျောင်းကို စစ်ကောင်စီတပ်ဘက်က ဗုံးကြဲတိုက်ခိုက်ခဲ့တာကြောင့် ဆရာမနှစ်ဦးအပါအဝင် ကလေးငယ် စုစုပေါင်း ၂၄ ဦးအထိ သေဆုံးခဲ့ရပြီး ရာနဲ့ချီ ထိခိုက်ဒဏ်ရာရရှိခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
