မိုင်းရူပ၊ မေလ ၂၃ ရက်၊ မိုင်းရယ်
ရှမ်းမြောက် မိုင်းရယ်မြို့မှာ ရှမ်းပြည်တိုးတက်ရေးပါတီ- SSPP တပ်ဖွဲ့ဝင်တွေ စီးလာတဲ့ ကားတစ်စီးဟာ ဆီဖြည့်နေစဉ် ပေါက်ကွဲမှုဖြစ်ပြီး ဒဏ်ရာရသူတချို့ ရှိခဲ့တယ်လို့ မိုင်းရယ်ဒေသခံတစ်ဦးက ရွှေဖီမြေကို ပြောပါတယ်။
မနေ့ မေလ ၂၂ ရက် မနက် ၈ နာရီဝန်းကျင်မှာ SSPP တပ်ဖွဲ့ဝင်တွေ စီးလာတဲ့ ကားတစ်စီးဟာ မိုင်းရယ်မြို့အထွက်ရှိ ပန့်ဆီဆိုင်မှာ ဆီဖြည့်နေစဉ် ပေါက်ကွဲမှုဖြစ်ပြီး SSPP တပ်ဖွဲ့ဝင်နဲ့ ဆီဆိုင်ဝန်ထမ်းတချို့ ဒဏ်ရာ ရခဲ့တယ်လို့ ဆိုပါတယ်။
“မနေ့ ဒဏ်ရာ ရတဲ့သူတွေ မိုင်းရယ်ဆေးရုံမှာ ရောက်နေတာ တွေ့တယ်။ ဆီဆိုင်မှာ ပေါက်ကွဲမှုဖြစ်တာ။ ဆီဖြည့်ရင်းနဲ့ ပေါက်ကွဲမှုဖြစ်တာ။ ဖြစ်တာလည်း ရှမ်းစစ်သားပဲ။ တစ်ယောက်က ပေါင် ပြတ်သွားတယ်” လို့ ဖြစ်စဉ်ကို သိရှိတဲ့ မိုင်းရယ်ဒေသခံတစ်ဦးက ရွှေဖီမြေကို ပြောပါတယ်။
ပေါက်ကွဲမှာ SSPP တပ်ဖွဲ့ဝင်ရဲ့ လက်ပစ်ဗုံး ပြုတ်ကျပြီး ပေါက်ကွဲတာလို့ ဒေသခံတွေက ပြောဆိုနေကြပြီး ရွှေဖီမြေက သီးခြားအတည်ပြုနိုင်ခြင်း မရှိသေးပါဘူး။
ပေါက်ကွဲမှုကြောင့် ထိခိုက်ဒဏ်ရာ ရသူတွေရဲ့ အရေအတွက် အတိအကျကို မသိရသေးဘဲ ဒေသတွင်း သတင်းဌာနတွေမှာတော့ ဒဏ်ရာရသူ ၆ ဦးရှိကြောင်း ရေးသားဖော်ပြကြပါတယ်။
မိုင်းရယ်မြို့ထဲ စစ်တပ်အပြင် SSPP တပ်လည်း သွားလာလှုပ်ရှားတဲ့နေရာ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
