လွေးဇွန်မိုး၊ မေလ ၂၂ ရက်၊ မိုင်းကိုင်
ရှမ်းတောင် မိုင်းကိုင်မြို့နယ် ခေးအုံအွေ့ကျေးရွာအုပ်စု ပန်မွန်းရွာက ရှမ်းပြည်တိုးတက်ရေးပါတီ- SSPP ရဲ့တပ်သားတစ်ဦး ထွက်ပြေးသွားလို့ဆိုပြီး အဲပန်မွန်းရွာထဲက အသက်မပြည့်သေးတဲ့ အမျိုးသမီးငယ် ၂ ဦးကို SSPP တပ်က ဖမ်းဆီးသွားခဲ့တယ်လို့ ရွှေဖီမြေက စုံစမ်းသိရှိရပါတယ်။
ပြီးခဲ့တဲ့ မေလ ၁၉ ရက် မနက် ၇ နာရီ ဝန်းကျင်မှာ ပလောင်လူမျိုးတွေ ဖြစ်ကြတဲ့ အသက် ၁၂ နှစ်အရွယ် လွေးအေးထွေးနဲ့ အသက် ၁၃ နှစ်အရွယ် လွေးအေးအွန်တို့ဟာ လက်ဖက်ခြံကို သွားနေစဥ် SSPP တပ်က ရွာထဲဝင်လာပြီး ဖမ်းဆီးသွားခဲ့တာလို့ ဖြစ်စဥ်သိရှိသူ ဒေသခံတစ်ဦးက ပြောပါတယ်။
“ရွာထဲမှာ ဖမ်းသွားတာ။ ကလေး ၂ ယောက်က လက်ဖက်သွားခူးမလို့ စစ်သားလည်းလာပြီဆိုတော့ သူတို့နဲ့သွားတိုးတော့ ဖမ်းသွားတာ။ ရွာက (SSPP ရဲ့) တပ်သားတစ်ယောက် ထွက်ပြေးသွားလို့လေ အဲကြောင့်မို့ ဖမ်းတာတဲ့။ အဲတပ်သား ထွက်ပြေးတာ လဝက်လောက်ပဲ ရှိအုံးမယ်ထင်တယ်”
ဖမ်းဆီးသွားတဲ့ ကလေးတွေကို ပြန်လွှတ်ပေးဖို့ ရွာသူကြီးနဲ့ ကလေးမိဘတွေက SSPP ထံ သွားရောက်တောင်းဆိုခဲ့ပေမဲ့ လက်ရှိအချိန်အထိ ပြန်လွှတ်ပေးတာ မရှိပဲ အမျိုးသမီးငယ် ၂ ဦးကို လွယ်ခူးရွာရှိ SSPP တပ်စခန်းမှာ ဖမ်းဆီးထားဆဲဖြစ်တယ်လို့ ဆိုပါတယ်။
ဒါ့အပြင် ထွက်ပြေးသွားတဲ့ တပ်သားအတွက် လူအစားထိုးပြန်ပို့ပေးနိုင်မှသာ အမျိုးသမီးငယ် ၂ ဦးကို ပြန်လွှတ်ပေးမယ်လို့ အထက်ပါ ဒေသခံတစ်ဦးက ဆက်ပြောပါတယ်။
“လူအသစ်ပြန်ဝယ်ထည့်ပြီးမှ အဲကလေး ၂ ယောက်ကို ပြန်လွှတ်ပေးမယ်တဲ့။ လူသစ်ပြန်ဝယ်ထည့်ဖို့က ပိုက်ဆံစုရအုံးမှာ။ တစ်အိမ်ကို ပိုက်ဆံဘယ်လောက်ကျမလဲ မသိဘူး။ ရွာကလူတွေလည်း အဆင်မပြေကြတော့ ပိုက်ဆံက မရသေးဘူး”
ထွက်ပြေးသွားတဲ့ တပ်သားဟာ SSPP တပ်ထဲဝင်တာ ၂ နှစ်ဝန်းကျင်ရှိပြီး လက်ရှိမှာတော့ ရွာသူရွာသားတွေက SSPP တပ်ကို တပ်သားသစ်ပြန်ပေးနိုင်ဖို့ လူငှားပေးဖို့စီစဉ်နေပြီး လူတစ်ဦးကို သိန်း ၇၀ ကျပ်နဲ့ ငှားရမယ်လို့ ဆိုပါတယ်။
အလားတူ လုံစံ၊ နောင်တော၊ ကုန်းပေါင်း၊ လွဲရွဲ၊ မောက်လျံ၊ နောင်စံဖူး၊ တုံလော၊ ပန်ကေတု၊ ဟမ်းငိုင်း၊ ဟိုခဲ စတဲ့ရွာတွေမှာ ပြီးခဲ့တဲ့နှစ်တွေက တစ်ရွာကို လူတစ်ဦးသာ SSPP တပ်ထဲသွားရပေမဲ့ ပြီးခဲ့တဲ့ ဇန်နဝါရီလကစပြီး SSPP တပ်က တစ်အိမ်ကို တစ်ဦးနှုန်း စစ်မှုထမ်းဖို့ ကောက်ခံနေတယ်လို့ ဒေသခံတွေကပြောပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
