အိုက်ပွီး၊ မေလ ၂၁ ရက်၊ တီးတိန်
စစ်ကိုင်းတိုင်း၊ ကလေးမြို့ကနေ ချင်းပြည်နယ်မြောက်ပိုင်းကို စစ်ကြောင်းထိုးတဲ့ စစ်ကောင်စီတပ်နဲ့ ချင်းကာကွယ်ရေးတပ်တို့ တီးတိန်မြို့နယ်မှာ တိုက်ပွဲပြင်းထန်နေတယ်လို့ ရှေ့တန်းစစ်ရေးသတင်းအရစ်မြစ်က ရွှေဖီမြေသို့ ပြောပါတယ်။
တီးတိန်မြို့နယ် ကလေး-သိုင်းငင်း ကားလမ်းပေါ်က မွှာလ်ပီကျေးရွာအနီးမှာ ဒီနေ့ မေလ ၂၁ ရက်နေ့၊ မနက် ၈ နာရီမှာ ကလေးမြို့ကနေ စစ်ကား ၁၅ စီးနဲ့ အင်အား ၂၀၀ ကျော်ဖြင့် စစ်ကြောင်းထိုးလာတဲ့ စစ်ကောင်စီတပ်နဲ့ ချင်းကာကွယ်တပ်တို့ တိုက်ပွဲပြင်းထန်နေတာ ဖြစ်ပါတယ်။
“စစ်ကြောင်းက ဘယ်မြို့ကို ဦးတည်ပြီး တက်လာတယ်ဆိုတာ မသိရသေးဘူး။ ဒါပေမယ့် အခုမွှာလ်ပီရွာကျော်လာပြီ။ ဒီနေ့မနက် မွှာလ်ပီရွာအကျော်မှာ ပစ်ခတ်သံတွေကြားနေရပြီ။ စစ်ကောင်စီတပ်ဘက်ကလည်း ပါလာတဲ့လက်နက်ကြီးကျည်တွေ အဆက်မပြတ် ပစ်ခတ်နေပါတယ်။”လို့ ရှေ့တန်းစစ်ရေးသတင်းအရစ်မြစ်က ရွှေဖီမြေသို့ ပြောပါတယ်။
ဒီနေ့မနက်ဖြစ်ပွားတဲ့ တိုက်ပွဲဟာ နေ့လယ် ၁၂ နာရီထိ ပစ်ခတ်မှုဖြစ်ပွားပြီး စစ်ကောင်စီတပ်က လက်နက်ကြီးတွေ အဆက်မပြတ် ပစ်ခတ်နေတယ်လို့ သိရပါတယ်။
“တိုက်ပွဲက နေ့လယ်အချိန်ထိ ပစ်ခတ်နေတုန်းပါ။ စစ်ကောင်စီဘက်က လက်နက်ကြီးတွေ ပိုအသုံးပြု ပစ်ခတ်လာတယ်။ ချင်းကာကွယ်ရေးတပ်ဘက်ကလည်း အင်အားတွေ ပိုအသုံးပြုတယ်။ လက်ရှိ နှစ်ဖက်ထိခိုက်မူရှိ အခြေအနေမသိရသေးပေမယ့် တိုက်ပွဲက ပြင်းထန်နေပါတယ်။ စစ်ကောင်စီ စစ်ကြောင်းကလည်း တိုက်ပွဲပြင်းထန်နေလို့ ရှေ့ဆက်မတိုးနိုင်သေးပါဘူး။”လို့ ရှေ့တန်းစစ်ရေးသတင်းအရစ်မြစ်က ရွှေဖီမြေသို့ ပြောပါတယ်။
နှစ်ဖက်တိုက်ပွဲပြင်းထန်နေတဲ့အတွက် ကလေး-သိုင်း ကားလမ်းပေါ်က မွှာလ်ပီး၊ ဗွန်ဆဲန်း၊ ထေဇန်နဲ့ အခြားကျေးရွာတွေက ဒေသခံပြည်သူတွေဟာ ဘေးလွတ်ရာ တောတောင်နဲ့ တောင်ယာတဲတွေမှာ ထွက်ပြေးတိမ်းရှောင်နေရပါတယ်။
ကလေး-သိုင်းငင်း ကားလမ်းဟာ တီးတိန်းမြို့ကို ရောက်ရှိသလို ဖလမ်းမြို့ကိုလည်း ရောက်ရှိတဲ့အတွက် စစ်ကောင်စီ စစ်ကြောင်းဟာ ဘယ်မြို့ကို ဦးတည်ထိုးစစ်ဆင်နေတယ်ဆို မသိရှိရသေးပါဘူး။
ဖလမ်းမြို့ကို ချင်းညီနောင်နဲ့ မဟာမိတ်ပူးပေါင်းတပ်တွေက သိမ်းပိုက်ရရှိပြီး တီးတိန်မြို့ပေါ်ကို စစ်ကောင်စီတပ်က ထိန်းချုပ်ထားကာ စစ်အုပ်ချုပ်ရေးယန္တယားတွေ လှည်ပတ်နေဆဲဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
