မိုင်းပန်ပျော်၊ မေလ ၂၁ ရက်၊ လွိုင်လင်
ရှမ်းတောင် တောင်ကြီးမြို့နဲ့ လွိုင်လင်မြို့ကြားမှာ မိုးရွာသွန်းပြီး မြေပြိုကျတာကြောင့် ညဘက် ကားအသွားအလာတွေကို ၁၅ ရက်ပိတ်ပင်ထားမယ်လို့ ခရီးသွားသူတွေဆီက သိရှိရပါတယ်။
ပြီးခဲ့တဲ့ မေလ ၁၅ ရက်က မိုးရွာသွန်းမှုကြောင့် တောင်ကြီးနဲ့ လွိုင်လင်ကြားမှာ မြေပြိုကျပြီး ရွံ့တွေထူထပ်နေတာကြောင့် လမ်းပြင်နေတဲ့အချိန် ညပိုင်းကားအသွားအလာတွေကို ၁၅ ရက်ကြာလမ်းပိတ်ထားတယ်လို့ ကားသမားတစ်ဦးက ရွှေဖီမြေကိုပြောပါတယ်။
“မနှစ် မိုးရာသီကုန်ခါနီးကတည်းက အဲ့လမ်းပြိုကျတာ ပြိုကျပြီးကတည်းက ကတ္တရာမခင်းဘူးလေ။ မြေသားပဲရှိသေးတဲ့ အချိန်ကျတော့ အခုမိုးရွာတယ်တောင်တွေပြန်ပြိုတယ်။ တောင်တွေပြန်ပြိုတော့ ရွံ့ဗွတ်တွေဖြစ်တယ်။ လမ်းပေါ်တွေပိတ်တယ်။ ကားတွေသွားလို့မရဘူး။ ကားအနိမ့်တွေဆိုရင် တစ်ဝက်ထိမြှုပ်တယ် အဲ့ဒါကြောင့် သူတို့လမ်းပြန်ပြင်နေတာ တစ်ဖက်ချင်းစီပြင်ပြီးတော့ နေ့ဆိုကားတွေလွတ်တယ်။ ညဆိုကားတွေပေးမသွားဘူး။ ညဆိုသူတို့လမ်းပြန်ရှင်းတာ”လို့ ဆိုပါတယ်။
မိုးရွာသွန်းပြီး မြေပြိုကျတာကြောင့် တောင်ကြီး လွိုင်လင်လမ်းကို မေလ ၂၀ ရက်ကနေ ဇွန်လ ၃ ရက်အထိ ညပိုင်းသွားတဲ့ကားတွေကို ပိတ်ထားမယ်လို့တာဝန်ရှိသူတွေက ထုတ်ပြန်ထားပါတယ်။
လမ်းပိတ်ဆို့မှုကြောင့် ကားသမားတွေအတွက် အချိန် ကြန့်ကြာမှုဖြစ်စေပြီး ကုန်ပစ္စည်းနဲ့ အရေးပေါ်ကားတွေအတွက် အခက်အခဲဖြစ်နေတယ်လို့ အထက်ပါကားသမားက ဆက်ပြောပါတယ်။
ပြီးခဲ့တဲ့ မေလ ၁၅ ရက် မိုးရွာသွန်းမှုကြောင့် တောင်ကြီးမြို့ပေါ်က ရပ်ကွက်တွေအများစု ရေကြီးရေလျှံကြုံခဲ့ရပြီး ရပ်ကွက်ထဲက နေအိမ်ထဲဝင်ရောက်ပြီး ပစ္စည်းဆုံးရှုံးမှုတွေ ကြုံခဲ့ရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
