ခိုင်လေး၊ မေလ ၂၁ ရက်၊ မြိုင်
မကွေးတိုင်း မြိုင်မြို့နယ် အနောက်မြောက်ဘက်ခြမ်းက ဗဟင်းရွာက စာသင်ကျောင်းအနီးမှာ ရှိတဲ့ ထမင်းဆိုင်တစ်ခုကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် PDF ရဲဘော် ၄ ဦး အပါအဝင် စုစုပေါင်း ၆ ဦး သေဆုံးခဲ့ပါတယ်။
မနေ့ မေလ ၂၀ ရက် ည ၅ နာရီခွဲ ဝန်းကျင်မှာ တံတားဦးလေတပ်ကနေ တက်လာတဲ့ ဂျက်ဖိုက်တာတစ်စီးဟာ တိုက်ပွဲဖြစ်ပွားခြင်းမရှိဘဲ လေကြောင်းတိုက်ခိုက်မှု ပြုလုပ်ခဲ့တာဖြစ်တယ်လို့ ဒေသခံတစ်ဦးက ရွှေဖီမြေကို ပြောပါတယ်။
”ပေါင်ဘယ်လောက်နဲ့ လာချသွားတာလဲ ဆိုတာကိုတော့ အသိအကျတော့ မသိရဘူးဗျ။ စာသင်ကျောင်းအနီးက ထမင်းဆိုင်မှာကျတာ။ အဲမှာ ထမင်းဝင်စားနေတဲ့ PDF ရဲဘော် ၄ ဦးနဲ့ ဒီဆိုင်ရှင် သားအမိ၂ ဦး စုစုပေါင်း ၆ ဦး သေဆုံးခဲ့တယ်လို့ သိရပါတယ်ဗျ”
ကျဆုံးသွားတဲ့ PDF ရဲဘော် ၄ ဦးဟာ ယင်းမာပင်ခရိုင် တပ်ရင်း ၁၂ တပ်ခွဲ (၃) TRIPLE-R တပ်ဖွဲ့ မှ တပ်ခွဲမှူး ရဲဘော်ဇော်မြတ်၊ ရဲဘော်ဒေးဗစ် ၊ ရဲဘော်မွန်း ၊ ရဲဘော်လင်းယုန် ဆိုသူတို့ ဖြစ်ကြတယ်လို့ ဆိုပါတယ်။
ပြီးခဲ့တဲ့ မေလ ၁၉ ရက် ည ၈ နာရီခွဲဝန်းကျင်ကလည်း မြိုင်မြို့နယ်အရှေ့မြောက်ဘက်ခြမ်းက ဖျသီးရွာအနီးကို တံတားဦးလေတပ်ကနေ တက်လာတဲ့ ဂျက်ဖိုက်တာတစ်စီး လေကြောင်းတိုက်ခိုက်မှု ပြုလုပ်ခဲ့တာကြောင့် ဒေသခံ ၄ ဦး ထိခိုက်ဒဏ်ရာရခဲ့ပါတယ်။
စစ်ကောင်စီတပ်ဟာ အခု ရက်ပိုင်း အများပြည်သူအသုံးပြုနေတဲ့ စာသင်ကျောင်း၊ ဘာသာရေးအဆောက်အဦးအပြင် ဒေသခံတွေ နေထိုင်တဲ့ နေရာတွေကို ပစ်မှတ်ထား လေကြောင်း တိုက်ခိုက်မှု ခပ်စိပ်စိပ် ပြုလုပ်နေတာကြောင့် ဒေသခံပြည်သူတွေအနေနဲ့ ဝေဟင်သတိ အမြဲရှိဖို့ တော်လှန်ရေးတပ်ဖွဲ့မှ တာဝန်ရှိသူတွေက အသိပေးတိုက်တွန်းထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
