ပို့လဘား၊ မေလ ၂၀ ရက်၊ မန်တုံ
တအာင်းတပ်မတော် PSLF/TNLA ထိန်းချုပ်ထားတဲ့ မန်တုံမြို့နယ်မှာ သက်တမ်းကုန်တဲ့ စားသောက်ကုန်ပစ္စည်းတွေကို တအာင်းရဲတပ်ဖွဲ့တွေက ပြီးခဲ့တဲ့ မေလ ၁၈ ရက်နေ့မှာ လိုက်လံစစ်ဆေးတာတွေ ပြုလုပ်ခဲ့တယ်လို့ TNLA က ထုတ်ပြန်ထားပါတယ်။
အဆိုပါ စစ်ဆေးရရှိထားတဲ့ သက်တမ်းကုန်နေတဲ့ စားသောက်ကုန်နဲ့ ဆေးဝါးတွေကို မီးရှို့ဖျက်ဆီးခဲ့တယ်လို့ ဖော်ပြထားပါတယ်။
ဒေသခံအမျိုးသမီးတစ်ဦးက”အဲလိုစစ်တာတွေ ကောင်းပါတယ်။ သက်တမ်းကုန်တဲ့ဟာတွေ မရောင်းတာပဲ ကောင်းတယ်။ ကျန်းမာရေးအတွက်ကြည့်မယ်ဆိုရင်ပေါ့။ ဒါပေမဲ့ ဆိုင်ပိုင်ရှင်အတွက် ပြန်ကြည့်ရင်တော့ နစ်နာတာပေါ့။ ဆိုင်တိုင်းတော့ အခုထိမရောက်သေးဘူး။ တချို့ဆိုင်တွေပဲ စစ်ရသေးတယ်”လို့ ပြောပါတယ်။
ဒါ့အပြင် ပြီးခဲ့တဲ့ မေလ ၁၂ ရက်မှာလည်း နမ့်ခမ်းမြို့နယ် မိုင်းဝီးမြို့အတွင်း မြို့စီမံအုပ်ချုပ်ရေးကော်မတီကသက်တမ်းကုန်ဆုံးနေတဲ့ ဆေးဝါးနဲ့ စားသောက်ကုန်ပစ္စည်းတွေကို လိုက်လံစစ်ဆေးမှု ပြုလုပ်ခဲ့တယ်လို့ သိရပါတယ်။
သက်တမ်းကုန်နေတဲ့ စားသောက်ကုန်ပစ္စည်းတွေကို လိုက်လံစစ်ဆေးရာမှာ ဝယ်ယူစားသုံးနေတဲ့ ဒေသခံတွေကို သက်တမ်းကုန်နေတဲ့ စားသောက်ကုန်နဲ့ ဆေးဝါးတွေကို မဝယ်မိရန် စစ်ဆေးတာဖြစ်ပြီး ရောင်းချနေတဲ့ ဆိုင်ပိုင်ရှင်တွေကိုလည်း ထပ်မံရောင်းချတာတွေ မပြုလုပ်ဖို့ ပထမအကြိမ် သတိပေးခဲ့တာဖြစ်ပြီး ထပ်မံတင်သွင်းရောင်းချပါက ပစ္စည်းတွေရဲ့ တန်ဖိုးအတိုင်း ပြန်လျော်ပေးရမှာဖြစ်တယ်လို့ TNLAရဲ့ ထုတ်ပြန်ချက်မှာ ဖော်ပြထားပါတယ်။
ပြီးခဲ့တဲ့ မတ်လ ၂၁ ရက်ကလည်း နမ္မတူမြို့ မြို့မဈေးထဲမှာ သက်တမ်းကုန်နေတဲ့ စားသောက်ကုန်၊ အလှကုန်နဲ့ ဆေးဝါးတွေကို PSLF/ TNLA ရဲ့ ရဲတပ်ဖွဲ့တွေက လိုက်လံစစ်ဆေးတာတွေလည်း ပြုလုပ်ခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
