လွေးထွေး၊ မေလ ၂၀ ရက်၊ တန့်ယန်း
“ဝ”ပြည်သွေးစည်းညီညွတ်ရေးတပ်မတော် UWSA က ရှမ်းမြောက် တန့်ယန်းမြို့နယ်ထဲက ကျေးရွာအုပ်စုတချို့နဲ့ မြို့ပေါ်ရပ်ကွက်တချို့မှာ တပ်သားသစ် စုဆောင်းနေတာကြောင့် လူထုတွေ အခက်ကြုံနေရကြောင်း တန့်ယန်းမြို့နေ အမျိုးသမီးတစ်ဦးရဲ့ ပြောပြချက်အရ သိရပါတယ်။
UWSA က လူစုပေးဖို့ ပြီးခဲ့တဲ့ မေလ ၁၅ ရက်က ကျေးရွာနဲ့ ရပ်ကွက်အုပ်ချုပ်ရေးမှူးတွေကို အစည်းအဝေးတစ်ရပ်ခေါ်ယူကာ ပြောဆိုခဲ့တာဖြစ်ပြီး စစ်သားအဖြစ် စုဆောင်းခံရသူတွေအနေနဲ့ စစ်သင်တန်း ၆ လ တက်ပြီးပါက မိမိရပ်ရွာဒေသအတွက် လုံခြုံရေး ပြန်လုပ်ဖို့အတွက်သာဖြစ်ကြောင်း ပြောဆိုထားပါတယ်။
ဟိုတာအုပ်စုနေ ဒေသခံတစ်ဦးက “ဒီနေ့နောက်ဆုံး စာရင်းကောက်တာဖြစ်တယ်။ မသွားလို့မရဘူးတဲ့။ လူထုတွေက ကြောက်ကြတယ်။ မသွားချင်ကြဘူး။ ဒါပေမဲ့ အမိန့်ဆိုတော့လေ။ ဟိုအဖွဲ့က ကောက်လိုက်၊ ဒီအဖွဲ့က ကောက်လိုက်နဲ့ ရွာကလူတွေ ကုန်တော့မယ်” လို့ ပြောပါတယ်။
တပ်သားသစ်အတွက် စာရင်းကောက်ခံတဲ့ အုပ်စုတွေထဲမှာ ဟိုတာအုပ်စု၊ နားဟုတ်အုပ်စု၊ လုံမုံအုပ်စု၊ နောင်ဖာအုပ်စု၊ နမ့်ဟူးအုပ်စု၊ မိုင်းကျိုင်အုပ်စု ၊ ပန်ညောင်အုပ်စု ၊ နောင်လိုင်အုပ်စု၊ နမ့်မူဆယ်အုပ်စု၊ ပါဆန်အုပ်စုတို့ဖြစ်ပြီး ကျေးရွာတစ်ရွာကို အနည်းဆုံး ၃၀ ကနေ ၅၀ ကြား လာရောက်စစ်မှုထမ်းဖို့ ခေါ်ယူတာဖြစ်တယ်လို့ ဆိုပါတယ်။
ကျေးရွာတွေအပြင် တန့်ယန်းမြို့ပေါ်က ရပ်ကွက်တချို့မှာလည်း စစ်မှုထမ်းဖို့ ခေါ်ယူပေမဲ့ ရပ်ကွက်အတိအကျကိုတော့ မသိရသေးကြောင်း တန့်ယန်းမြို့နေ အမျိုးသမီးက ဆိုပါတယ်။
“မြို့ပေါ်က စစ်တပ်တွေနေတဲ့ ရပ်ကွက်ကလွှဲလို့ ဝတပ်က စစ်ကောက်တယ်လို့ ပြောနေကြတယ်။ ဒါပေမဲ့ ကျွန်မတို့နေတဲ့ ရပ်ကွက်တော့ မကြားမိဘူး။ လူမျိုးဘာသာမရွေး ခေါ်တယ်လို့လည်း ကြားတယ်” လို့ ပြောပါတယ်။
တန့်ယန်းမြို့ကို စစ်ကောင်စီတပ်က ထိန်းချုပ်ထားပေမဲ့ ၂၀၂၄ ခုနှစ် ဇူလိုင် ၁၀ ရက်မှာ UWSA က အင်အားအလုံးအရင်းနဲ့ တန့်ယန်းမြို့နယ်ထဲကို ဝင်ရောက်လာပြီး လုံခြုံရေးအပိုင်းတချို့ကို တာဝန်ယူပေးထားကြောင်း ဒေသခံတွေရဲ့ ပြောပြချက်အရ သိရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
