ခိုင်လေး၊ မေလ ၁၉ ရက်
ချင်းကာကွယ်ရေးတပ်- အရှို (CDF-Asho)ရဲ့ စစ်ဆင်ရေး လှုပ်ရှားရာနယ်မြေနဲ့ ထိစပ်နေတဲ့ ဒေသတွေမှာ လာရောက်ကာ တာဝန်ထမ်းဆောင်မယ့် ကျောင်းဆရာဆရာမတွေကို ခြိမ်းခြောက်တာ၊ နှောင့်ယှက်ဟန့်တားတာ၊ ဖမ်းဆီးထိန်းသိမ်းတာတွေ လုံးဝ ပြုလုပ်မှာ မဟုတ်ဘူးလို့ CDF-Asho က ထုတ်ပြန်လာပါတယ်။
မကွေးတိုင်း ငဖဲမြို့နယ် တောင်ပေါ်ဒေသနဲ့ မြေပြန့်ဒေသ ကျေးရွာရှိ စာသင်ကျောင်းမှာ တာဝန်ထမ်းဆောင်မယ့် ကျောင်းဆရာဆရာမတွေရဲ့ ပညာသင်ကြားမှုအပြင် ကျောင်းကိစ္စမှာ ဝင်ရောက် စွက်ဖက်တာတွေ လုပ်မှာမဟုတ်သလို လုပ်တဲ့သူတွေကိုလည်း တားမြစ်အရေးယူမှာဖြစ်တယ်လို့ အသိပေးထားပါတယ်။
”ကျောင်းနေအရွယ်ကလေးတွေအားလုံး စာသင်ကြားမှု မလှစ်ဟင်းစေဖို့အတွက် ကျနော်တို့ ထုတ်ပြန်ရခြင်းဖြစ်တယ်။ ပြီးခဲ့တဲ့ အာဏာမသိမ်းခင်ကာလကရော အာဏာသိမ်းပြီးတဲ့ ကိစ္စတွေကို ထောက်စပြီး ကျောင်းဖွင့်မှုအပိုင်းတွေ စာသင်ကြားမယ့်အပိုင်းတွေမှာ ကျနော်တို့အနေနဲ့ ဝင်ရောက်စွက်ဖက်မှုတွေ ကျနော်တို့ကြောင့် အနှောင့်အယှက် တစ်စုံတစ်ရာ မဖြစ်စေရဘူးဆိုတာမျိုးကို ကျနော်တို့အနေနဲ့ ပညာသင်ကြားမယ့် ဆရာဆရာမတွေကို သိရှိစေဖို့ တရားဝင် ကြေညာရခြင်းဖြစ်တယ်” လို့ CDF-Asho မှ ပြောရေးဆိုခွင့်ရှိသူ ဆလိုင်း ရိုချင်းက ရွှေဖီမြေကို ပြောပါတယ်။
တောင်ပေါ်ဒေသ ဖြစ်တာကြောင့် လမ်းပန်းဆက်သွယ်ရေး ခက်ခဲမှု အားနည်းချက်ရှိပြီး ဆရာဆရာမတွေ လာရောက်ကာ တာဝန် မထမ်းဆောင်ချင်တာ၊ မလာချင်တာ၊ မလာရဲတာတွေ စတဲ့ကိစ္စကြောင့် စာသင်ကြားမှု နောက်ကျတာအပြင် ပညာရေးပိုင်းမှာ နောက်ကျတာတွေ ကြုံနေရတယ်လို့ သူက ဆက်ပြောပါတယ်။
၂၀၂၅-၂၀၂၆ အခြေခံပညာသင်နှစ်အတွက် ကျောင်းတွေ စတင်ဖွင့်လှစ်တော့မှာဖြစ်ကာ ကျောင်းနေအရွယ် ကလေးသူငယ်တွေ ပညာသင်ကြားဖို့ လိုအပ်နေတာကို တွေ့ရတယ်လို့ ဆိုပါတယ်။
ပညာရေးဝန်ထမ်းတွေအနေနဲ့ ကျောင်းနေအရွယ် ကလေးတွေကို စေတနာ ဝါသနာ အနစ်နာ စတဲ့ ၃ ချက်ကို ခံယူအလေးထားပြီး လွတ်လပ်စွာ သင်ကြားပေးဖို့ကိုလည်း မေတ္တာရပ်ခံတယ်လို့ CDF-Asho က ဆိုပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
