ကမ္မမြို့နယ် ဂျိုးပျံရွာဆေးခန်းကို လေကြောင်းနဲ့ တိုက်ခိုက်၊ ၂ ဦး ဒဏ်ရာရ

ပျားကြီး၊ မေလ ၁၈ ရက်၊ ကမ္မ

မကွေးတိုင်း ပခက္ကူခရိုင် ကမ္မမြို့အနောက်ဖက် ဂျိုးပျံကျေးရွာဆေးခန်းကို စစ်ကောင်စီတပ်က လေကြောင်းနဲ့ တိုက်ခိုက်ခဲ့တာကြောင့် ၂ ဦး ထိခိုက်ဒဏ်ရာ ရရှိခဲ့တယ်လို့ ဒေသခံတွေက ပြောပါတယ်။

ဒီနေ့မနက်ပိုင်း ၆ နာရီ ၁၅ မိနစ်ဝန်းကျင်က တိုက်ပွဲ ဖြစ်ပွားတာမရှိဘဲ လေကြောင်းနဲ့ တိုက်ခိုက်ခဲ့တာဖြစ်ပြီး ဆေးခန်းအတွင်း ရှိနေသူတွေ ဒဏ်ရာ ရရှိခဲ့တာပဲ ဖြစ်ပါတယ်။

“အရှေ့ဖက် အဆောက်အဦးပေါ် တည့်တည့်ကျတာ။ ၂ လုံး ကွဲတယ်။ နောက် ၂ လုံးက မကွဲသေးဘူး။ မီးတွေ လောင်နေတယ်” လို့ ဒေသခံအမျိုးသားတစ်ဦးက ပြောပါတယ်။

လေကြောင်းနဲ့ တိုက်ခိုက်ခံရတဲ့ ဆေးခန်းဟာ ဒေသတွင်းမှာ စစ်ကောင်စီတပ်ရဲ့ မကြာခဏ လေကြောင်း တိုက်ခိုက်မှုကြောင့် ပိတ်ထားခဲ့ပေမဲ့ အစောင့်အဖြစ် နေထိုင်သူတချို့ ရှိနေသေးတယ်လို့ ဒေသခံတွေက ပြောဆိုပါတယ်။

လက်ရှိအချိန်မှာလည်း လေယာဉ်ပျံဝဲမှု ရှိနေသေးတာကြောင့် ဘေးလွတ်ရာ ထွက်ပြေးတိမ်းရှောင်နေရတယ်လို့ ဒေသခံတွေက ပြောပါတယ်။

စစ်တပ်ဟာ ဒီလအတွင်း အပစ်ရပ်သက်တမ်း တိုးထားတယ်လို့ ကြေညာခဲ့ပေမဲ့ မြေပြင်မှာတော့ နေရာအနှံ့မှာ လေကြောင်းတိုက်ခိုက်မှု ဆက်တိုက် လုပ်ဆောင်နေတာကြောင့် ကလေးသူငယ်အပါအဝင် လူထု ရာချီ သေဆုံးခဲ့ပါတယ်။

ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။

Shwe Phee Myay YouTube

Shwe Phee Myay Telegram