အိုက်ပွီး၊ မေလ ၁၇ ရက်၊ မင်းပြား
ရခိုင်ပြည်နယ် မင်းပြား မြို့သိမ်းတိုက်ပွဲအတွင်း ဖမ်းဆီးရမိတဲ့ စစ်ကောင်စီတပ်ဖွဲ့ဝင် ၂၂၅ ဦးကို အာရက္ခတပ်တော်- AA က ပြန်လွှတ်ပေးလိုက်တယ်လို့ ဒေသခံတွေဆီက သိရပါတယ်။
စစ်တပ်က ရခိုင်ပြည်နယ်ကို လေကြောင်း ဆက်တိုက် တိုက်ခိုက်နေပေမဲ့ AA က စစ်သုံ့ပန်းတွေကို ပြန်လွှတ်ပေးတာပဲ ဖြစ်ပါတယ်။
မနေ့ မေလ ၁၆ ရက်က အခမ်းအနား ကျင်းပပြီး မြို့သိမ်းတိုက်ပွဲအတွင်း စစ်သုံ့ပန်းနဲ့အတူ မိသားစုဝင်တွေကို စစ်ဆေးပြီး ပြန်လွှတ်ပေးလိုက်တယ်လို့ AA နဲ့နီးစပ်တဲ့ မင်းပြားဒေသခံ အမျိုးသားတစ်ဦးက ရွှေဖီမြေသို့ ပြောပါတယ်။
“မနေ့က နေ့လယ်မှာ စစ်သုံ့ပန်း ၂၀၀ ကျော်ကို AA က ပြန်လွှတ်ပေးလိုက်တယ်။ အဲထဲမှာ ရခိုင်ပြည်နယ်ဇာတိကလူတွေ များတယ်။ စစ်သုံ့ပန်းတွေနဲ့အတူ မိသားစုဝင် ကလေးတွေ၊ လူကြီးတွေ၊ အမျိုးသမီးတွေ အကုန်လုံး ပါတယ်”
စစ်သုံ့ပန်းတွေကို AA က စစ်သုံ့ပန်းဥပဒေနဲ့အညီ ကာကွယ်ထိန်းသိမ်းကာ စောင့်ရှောက်ပေးထားပြီးမှ ပြန်လွှတ်လိုက်တာဖြစ်တယ်လို့ ဆိုပါတယ်။
နောက်ထပ် AA နဲ့ နီးစပ်တဲ့ မင်းပြားဒေသခံတစ်ဦးက “စစ်သုံ့ပန်းတွေ ထိန်းသိမ်းထားတဲ့ နေရာကနေ သူတို့သွားချင်တဲ့နေရာကို သွားလို့ရတဲ့ ကားလမ်းအထိကို AA ရဲဘော်တွေက သေချာပို့ဆောင်ပေးထားပါတယ်” လို့ ရွှေဖီမြေသို့ ပြောပါတယ်။
ဧပြီ ၁၃ ရက် သင်္ကြန်အကြိုနေ့ကလည်း မင်းပြား မြို့သိမ်းတိုက်ပွဲအတွင်း ဖမ်းဆီးရမိတဲ့ စစ်သုံ့ပန်းနဲ့ မိသားစုဝင် ၁၇၀ ဦးကို AA က ပြန်လွှတ်ပေးခဲ့ဖူးပါတယ်။
ရခိုင်ပြည်နယ် မြို့သိမ်းတိုက်ပွဲအတွင်း AA က စစ်သုံ့ပန်း ထောင်နဲ့ချီ ဖမ်းဆီးရမိသလို ထောင်နဲ့ချီ လက်နက်ချ အလင်းဝင်လာသူလည်းရှိပြီး ၎င်းတို့ကို စစ်သုံ့ပန်းဥပဒေနဲ့အညီ ကာကွယ်ထိန်းသိမ်းစောင့်ရှောက်ထားတယ်လို့ သိရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
