ရွှေဖီမြေ၊ မေလ ၁၇ ရက်
ကချင်လွတ်လပ်ရေးအဖွဲ့ KIO ရဲ့ ဥက္ကဌဟောင်း Lanyaw Zawng Hra ကွယ်လွန်ခြင်းအတွက် တအာင်းတပ် PSLF/TNLA က ဝမ်းနည်းကြောင်းသဝဏ်လွှာ ပေးပို့ခဲ့တယ်လို့ PSLF/TNLA က မနေ့ မေလ ၁၆ ရက်မှာ ထုတ်ပြန်ခဲ့ပါတယ်။
ဥက္ကဌ Lanyaw Zawng Hra ဟာ ၁၉၆၄ ခုနှစ်ကတည်းက ကချင်လွတ်လပ်ရေးတပ်မတော် KIA ထဲ ဝင်ရောက်တာဝန်ထမ်းဆောင်ခဲ့သူဖြစ်ပြီး ၁၉၇၅ ခုနှစ်က ကချင်နဲ့ တအာင်းတို့ ထာဝရမဟာမိတ်စာချုပ် ချုပ်ဆိုခဲ့ရာမှာ ဥက္ကဌ Lanyaw Zawng Hra က KIO ရဲ့ အထွေထွေအတွင်းရေးမှူးအနေနဲ့ သဘောတူ လက်မှတ်ရေးထိုးခဲ့သူလည်း ဖြစ်ပါတယ်။
စစ်အာဏာရှင် မချုပ်ငြိမ်းခင်မှာ ကချင်လွတ်လပ်ရေးအတွက် တစိုက်မတ်မတ် ဦးဆောင်ခဲ့သူ Lanyaw Zawng Hra ကွယ်လွန်ခြင်းအပေါ် PSLF/TNLA က ဝမ်းနည်းကြောင်းနဲ့ ဥက္ကဌရဲ့ တော်လှန်ရေးအပေါ် သစ္စာရှိမှု၊ စွမ်းဆောင်မှုနဲ့ တည်ကြည်မှုတို့ကို PSLF/TNLA က တန်ဖိုးထားဂုဏ်ယူပြီး အစဉ်အောက်မေ့နေမှာ ဖြစ်တယ်လို့ ဆိုပါတယ်။
ဥက္ကဌ Lanyaw Zawng Hra က ၂၀၀၆ ခုနှစ်ကနေ ၂၀၁၇ ခုနှစ်အထိ KIO ရဲ့ ဥက္ကဌတာဝန်ကို ထမ်းဆောင်ခဲ့ပြီး Lanyaw Zawng Hra ဟာ ကချင်နဲ့ တအာင်းတို့ လူထုတို့အကြား ငြိမ်းချမ်းစွာ အတူယှဉ်တွဲနေထိုင်ရေးနဲ့ KIO နဲ့ PSLF တို့အကြား ပူးပေါင်းဆောင်ရွက်ရေးတို့အတွက် ဆောင်ရွက်ခဲ့သူတစ်ဦးလည်းဖြစ်တယ်လို့ ဆိုထားပါတယ်။
