လွေးဇွန်မိုး၊ မေလ ၁၇ ရက်၊ ကွတ်ခိုင်
တအာင်းတပ် TNLA ထိန်းချုပ်ထားတဲ့ ရှမ်းမြောက် ကွတ်ခိုင်မြို့နယ်က စျေးသည်သားအမိ ၂ ဦး ဓားပြတိုက်ခံရပြီး ငွေ သိန်း ၅၀ နီးပါးနဲ့ ဖုန်းလေးလုံး ပါသွားတယ်လို့ သိရပါတယ်။
မေလ ၁၅ ရက် ညနေ ၄ နာရီဝန်းကျင်မှာ တက္ကနိုင်းကျေးရွာဘက် စျေးသွားရောင်းပြီး ပြန်လာတဲ့ သားအမိ ၂ ဦးကို တက္ကနိုင်းနဲ့ မန်ရပ်ရွာကြားမှာ သေနတ်ကိုင်ဆောင်ထားတဲ့ အမျိုးသား ၃ ဦးက သေနတ်နဲ့ ပစ်ခတ်ခဲ့ပြီး ငွေနဲ့ ဖုန်းတွေ လုယူသွားခဲ့တာလို့ ဖြစ်စဥ်သိရှိသူ အမျိုးသားတစ်ဦးက ပြောပါတယ်။
“တက္ကနိုင်းကနေ စျေးရောင်းပြီး ကွတ်ခိုင်ကို ကုန်စိမ်းတွေဝယ်ဖို့ ပြန်ဆင်းလာတဲ့လမ်းမှာ တက္ကနိုင်းနဲ့ မန်ရပ်ကြားမှာ သေနတ်ကိုင်ထားတဲ့ လူသုံးယောက်က ကားဘီးကို သေနတ် လေးငါးချက်လောက် ပစ်ဖောက်တယ်တဲ့။ ဒါပေမယ့် နှစ်ချက်ပဲထိတယ်။ လူတော့ ဘာမှမဖြစ်ဘူး။ ပိုက်ဆံ ၄၀ ကျော် ၅၀ ဆယ်လောက်နဲ့ ဖုန်းလေးလုံးပါသွားတယ်။ ခရီးသည် နှစ်ယောက်ရဲ့ဖုန်းရော”
ဓားပြတိုက်ခံရသူတွေဟာ မာန်ဂျယ်ကျေးရွာအုပ်စု ဟိုဝမ်းရွာခံတွေဖြစ်ကြပြီး တားမိုးညဲ၊ မန်ဂျယ်၊ ရှောက်ဟော်နဲ့ တက္ကနိုင်းစျေးမှာ ကားနဲ့စျေးပတ်ရောင်းနေတဲ့ စျေးပတ်သည်တွေဖြစ်တယ်လို့ ဆိုပါတယ်။
လက်ရှိမှာတော့ ဓားပြတိုက်မှုနဲ့ပတ်သက်ပြီး TNLA ရဲ့ ကွတ်ခိုင်မြို့နယ် တရားဥပဒေစိုးမိုးရေးတပ်ဖွဲ့ထံ သွားရောက်တိုင်ကြားထားပြီး တရားဥပဒေစိုးမိုးရေးတပ်ဖွဲ့က စုံစမ်းစစ်ဆေးနေတယ်လို့ ဆိုပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
