ရွှေဖီမြေ၊ မေလ ၁၆ ရက်
ရှမ်းအမျိုးသားတော်လှန်ရေးနေ့ ကျရောက်တော့မှာဖြစ်တာကြောင့် ရှမ်းပြည်တိုးတက်ရေးပါတီ- SSPP ရဲ့ တပ်စခန်းတွေကို ထိုးစစ်ဆင်တိုက်ခိုက်တာတွေ ၁၀ ရက်အတွင်း ရပ်နားမယ်လို့ ရှမ်းပြည်ပြန်လည်ထူထောင်ရေးကောင်စီ- RCSS က ထုတ်ပြန်လိုက်ပါတယ်။
ထုတ်ပြန်ချက်ကို RCSS ရဲ့ သတင်းတွေကို ဖော်ပြပေးနေတဲ့ Hsan Loi Voice က ဒီနေ့ မေလ ၁၆ ရက်မှာ ရေးသားဖော်ပြထားပြီး RCSS/SSA လက်အောက်ခံတပ်ဖွဲ့အနေနဲ့ SSPP/SSA တပ်စခန်းတွေကို တိုက်ခိုက်တာတွေ မေလ ၂၅ ရက်အထိ လုံးဝ ရပ်နားထားမယ်လို့ ဆိုထားပါတယ်။
ရှမ်းအမျိုးသားတော်လှန်ရေးနေ့က လာမယ့် မေလ ၂၁ ရက်မှာ ၆၈ ကြိမ်မြောက်ဖြစ်ပြီး အဲနေ့မှာ SSPP နဲ့ RCSS တို့ နှစ်ဖက်တပ်ဖွဲ့ နဲ့ ပြည်သူလူထုတို့ တွေ့ဆုံဆွေးနွေးနိုင်ဖို့ RCSS /SSA ဥက္ကဌ ဗိုလ်ချုပ်ကြီး ယွက်စစ်မှ SSPP ထံ စာပေးပို့ထားတယ်လို့ ထုတ်ပြန်ချက်မှာ ဖော်ပြထားပါတယ်။
ရှမ်းတပ်နှစ်ဖွဲ့ဖြစ်တဲ့ SSPP နဲ့ RCSS တို့ဟာ ရှမ်းတောင်၊ မိုင်းကိုင်၊ ရပ်စောက်နဲ့ ပင်လုံမြို့နယ်တွေမှာ အပြန်အလှန် ပစ်ခတ်မှု မကြာခဏဖြစ်ပွါးနေကြတာ ဖြစ်ပါတယ်။
ဒါ့အပြင် RCSSက တစ်နိုင်ငံလုံး အပစ်ခတ်ရပ်စဲရေးစာချုပ် (NCA)ရေးထိုးထားတဲ့အဖွဲ့ဖြစ်ပြီး စစ်ကောင်စီတပ်နဲ့ တွေ့ဆုံတာတွေ ရှိသလို SSPPဘက်ကလည်း စစ်ကောင်စီတပ်နဲ့ မကြာခဏတွေ့ဆုံနေတဲ့အဖွဲ့လည်း ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
