လိုည်းထိုည်း၊ ကျံရ်မေ ဆငည်း 16၊ သပိတ်ကျင်း
ဘိူန်းအယ်နံပ်တ ကဝ်အီမိူဝ်ႈဇီုင်ကပ္လိူင် ခေဲင်ဆဒါင်ပကဖ အိူင်ပြင်ဦးလွင်ကဲ အူအီးက္လာင်းဒါႈ ကပီုန်ဒါင်းမန္တလေး ကညာအာဏာဆီုက်ဇေဝ်ကဲ ဟည်ပျောႈဘိုးဘျုင် ပလှံင်သပိတ်ကျင်း ဒီႎဲႈဆီုက်ႎဲႈနာန်း ကူန်ရဟ်မာဂါင်ကဲ 2 အီးယံမ်း တောပ်ပည်ကောန်ဒဲႇ 9 အီး ကတူႈဖေးဘာတ်ဟာဝ်းအောႏ။
အမှိူဝ် ကျံရ်မေ ဆငည်း 15 ခီညှာ ကပံတ် 9 နြီဒိူန် ပလှံင်သပိတ်ကျင်း ဒီႎဲႈဆီုက်ႎဲႈနာန်း အ်ုန်အီဂေါည် ခနားရဝ် 9 မဲင်ႏ ကာည်း ရဝ်လမ်းလယ်ကျစ် ကညာအာဏာဆီုက်ဇေဝ်ကဲ ဒါယာန်ပ်ုရ်ဂျက်ဖိုက်တာ ဒေဲႈပျောႈဟာဝ်းဘျုင် အ်ုန်အီဘိူန်းအဆာက် 60 ဆန်ုမ် ကောန်အီမာည်း အူအီး ကာည်း ကောန်အီပ်ုန်အူအီး ယံမ်းဟာဝ်းဖါ်ႈ ကောန်ဒဲႇ 4 အီးကာည်း တောပ်ပည် စဝ်အူပါး 9 အီး ကတူႈဖေးဘာတ်ဟာဝ်းအောႏ။
ကဝ်အီမိူဝ်ဇီုင်းကပ္လိူင်ခေဲင်ဆဒါင်ပကဖ အိူင်ပြင်ဦးလွင်နီန်အူအီး က္လာင်းဒါႈ “ ကူန်ရဝ်မာဂါင်ကဲ ကဒါႇနီန် ဂေါႇမိုႈ ကဲမိုႈပ်ုန်ပဴင်ပ်ုန်ပျောႈ စကစဂဲ ကဲလိုအေ့ ဂေါည်ဆဒိ။ ကနာည်နံင်ဒံန်ခြဲဖေးယာန်ပ်ုရ်နီန် ကဲလိုအေ့ ကိူဝ်ႈအူန်းကတဲ”။
တခေါရ်နံပ် ဘည်ပ္လိူရ်ႈလေႈ TNLA ကဲ ခည်ကျံရ်မေ ဆငည်း 12 ဒိူန်မာ် ကညာအာဆီုက်ဇေဝ်ကဲ ဒါယာန်ပ်ုရ်ဂျက်ဖိုက်တာ 2 လိူဝ်ႈ ဒေဲႈပျောႈဟာဝ်းဘျုင် ပအရာပ်ဟာဝ်းႎီရ် TNLA ကဲ ပရဝ်ညောင်ပင်သာ လှံင်သပိတ်ကျင်းနီန်အောႏ။
ဘာည်းလိူည်ဒီန် ခည်ကျံရ်မေ ဆငည်း 10 ဘံန်ဆံန် ကပံတ် 1 နြီဒိူန်မာ် ကဲဒါဘိုးဂျက်ဖိုက်တာ ပျောႈဟာဝ်းဘျုင် ပရဝ်ကျည်တောက်ပေါက် လှံင်စဉ့်ကူးနီန် တောပ်ပည် ကောန်ဒဲႇ 5 အီးယံမ်းဟာဝ်းဖါ်ႈ 3 အီးကတူႈဖေးဘာတ်ကဆဝ်း ဘံန်မိုႈ 1 နြီလေႈ 30 မနေတ်စီ ကဲဟည် ပျောႈဟာဝ်းဘိုး ပလှံင်သပိတ်ကျင်း ရဝ်ဇရပ်ကွင်းနီန် ကူန်ရဝ်မာဂါင် အူအီးယံမ်းဖါ်ႈ 7 အီးကတူဖေးဘာတ်ဟာဝ်းအောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဆျှိုည်ဖီမျေဂဲနီန် အာဝ်ဝံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်နီန်။
