ပို့လဘား၊ မေလ ၁၆ ရက်၊ ကွမ်းလုံ
ကိုးကန့်တပ်မတော်- MNDAAတပ်ထံ အလင်းဝင်လာတဲ့ စစ်ကောင်စီတပ်သားတွေဟာ လက်နက်ယူဆောင်ပြီး ထွက်ပြေးသွားခဲ့လို့ လိုက်လံဖမ်းဆီးရာမှာ ၃ဦးကို ပြန်ဖမ်းမိခဲ့တယ်လို့ ဒေသခံအမျိုးသားတစ်ဦးက ရွှေဖီမြေကို ပြောပါတယ်။
MNDAA တပ်ဟာ လားရှိုးမြို့ကနေ ထွက်ခွာသွားတဲ့အချိန်မှာ အဆိုပါစစ်သုံ့ပန်း၁၀ ဦးဟာ ကိုးကန့်တပ်ဆီ ကတိဝန်ခံချက်နဲ့ ဝင်လာခဲ့တာဖြစ်ပြီး ပြီးခဲ့တဲ့ မေလ ၁၀ ရက်က ထွက်ပြေးခဲ့ကြတာဖြစ်တယ်လို့ ပြောပါတယ်။
“သူတို့ကိုးကန့်တပ်ထဲ ဝင်လာတာမကြာသေးဘူး။ သူတို့အပြောင်းအရွှေ့လုပ်တဲ့အချိန်ပဲ အဲဒီစစ်သုံ့ပန်းတွေ ကွမ်းလုံဘက် ပြောင်းရွှေ့ထားတာ သိရတယ်။ ကြားရတာကတော့ သူတို့အသေခံမလား စစ်သားလုပ်မလားဆိုပြီး ပြောတယ်။ သူတို့ကစစ်သားလုပ်မယ်ဆိုပြီးပြောတယ်။ ကွမ်းလုံဗျူဟာထဲမှာ သူတို့ကိုထားတယ်။ ထားတာမကြာသေးဘူး ၃ ရက်ပဲရှိသေးတယ် သူတို့ထွက်ပြေးသွားတာပဲ”
အဆိုပါ ထွက်ပြေးသွားခဲ့ကြတဲ့ စစ်သုံ့ပန်းတွေဟာ လက်နက်တွေ ယူဆောင်သွားပြီး ကွမ်းလုံတောင်ပေါ်ဘက်မှာ ထွက်ပြေးသွားခဲ့ကြတာလို့ ဆိုပါတယ်။
“ဟိုတနေ့က သူတို့ကို ပြန်မိတယ်လေ။ အကုန်တော့မမိဘူး။ ကြည့်ရတာ သူတို့ကွမ်းလုံဘက်မှာ ဆိုရင် လမ်းကြောတွေ မသိလို့နေမယ်။ တောင်ပေါ်ဘက်မှာ ပြေးသွားကြတယ်။ လက်နက်တွေနဲ့လည်း ပါသွားတယ်”လို့ ဆိုပါတယ်။
MNDAAတပ်က လားရှိုးမြို့ ထွက်ခွာသွားတဲ့အချိန် လားရှိုးမြို့ အကျဉ်းထောင်မှာရှိတဲ့ စစ်သုံ့ပန်းနဲ့ မိသားစုဝင်တွေကို လောက်ကိုင်ဘက် ရွှေ့ပြောင်းတာရှိသလို တချို့ကလည်း ပြန်လွှတ်ပေးခဲ့တယ်လို့ သိရှိရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
