လွေးထွေး၊ မေလ ၁၅ ရက်၊ တန့်ယန်း
တန့်ယန်းမြို့ရှိ လောင်းကစားရုံတွေဟာ UWSA နဲ့ စစ်ကောင်စီတပ်ထံ အခွန်ဆောင်ပြီး ဆက်လက်ဖွင့်ခွင့် ရနေသေးကြောင်း ဒေသခံတစ်ဦးရဲ့ ပြောပြချက်အရ သိရပါတယ်။
ပြီးခဲ့တဲ့နှစ် ၂၀၂၄ ခုနှစ် ဇူလိုင် ၁၀ ရက်မှာ စစ်တပ် ထိန်းချုပ်ထားတဲ့ တန့်ယန်းမြို့ထဲ UWSA ဝင်လာပြီးနောက် မြို့ထဲ လောင်းကစားရုံ ပိုတိုးလာပြီး လက်ရှိအချိန်ထိ လောင်းကစားရုံ ၅၀ ကျော် ရှိနေပြီးတော့ တစ်လကို သိန်း ၅၀ ဝန်းကျင် အခွန်ဆောင်ပြီး တရားဝင် ဖွင့်လှစ်နေကြတာ ဖြစ်ပါတယ်။
ဒေသခံ အမျိုးသမီးက “အရင်ကထက် ပိုပြီး ဝိုင်းတွေက များလာတယ်။ လွတ်လွတ်လပ်လပ်ကို ဖွင့်နေကြတာ။ တချို့ဝိုင်းတွေဆိုရင် စစ်ဝတ်စုံတွေနဲ့ပါ လုံခြုံရေး လုပ်ပေးထားတာ တွေ့နေရတယ်။ အဲဒါက စစ်တပ်လား၊ ဝ လား မသိရဘူး” လို့ ပြောပါတယ်။
လောင်းကစားဝိုင်း ထပ်တိုးလာတာကြောင့် လောင်းကစားနဲ့အတူ မူးယစ်သုံးစွဲသူ ပေါများလာပြီး မြို့တွင်း လုံခြုံရေး စိုးရိမ်လာရတာနဲ့ ခိုးမှု၊ လုယက်မှု၊ ဓားပြတိုက်မှု ဖြစ်ပွားနေသလို မိသားစုအတွင်း ပြဿနာတွေလည်း ပိုကြုံလာရကြောင်း အထက်ပါအမျိုးသမီးက ပြောဆိုပါတယ်။
နောက်ထပ် ဒေသခံ အမျိုးသားက “အဓိက ဖွင့်ခွင့်ပေးနေတာက စစ်တပ်နဲ့ ဝ တပ်က ဖြစ်တယ်။ ဒါကြောင့် တန့်ယန်းမြို့တစ်မြို့လုံးနီးပါးက လောင်းကစားသားကောင် ဖြစ်လာမှာကို စိုးရိမ်တယ်။ အထူးသဖြင့် ရွာပိုင်းက လူတွေအတွက် ပိုစိုးရိမ်ရတယ်” လို့ ပြောပါတယ်။
တန့်ယန်းမြို့ထဲ စစ်တပ်နဲ့ UWSA ရှိနေပြီး အုပ်ချုပ်ရေးအပိုင်းတွေမှာ စစ်ကောင်စီတပ်ကသာ တာဝန်ယူထားပေမဲ့ လုံခြုံရေးအပိုင်းကိုတော့ ဘယ်အဖွဲ့မှ တာဝန်ယူ လုပ်ဆောင်ပေးတာ မရှိကြောင်း ဒေသခံတွေရဲ့ ပြောပြချက်အရ သိရပါတယ်။
