ပို့လဘား၊ မေလ ၁၅ ရက်၊ မိုးကုတ်
တအာင်းတပ်မတော် TNLA ထိန်းချုပ်ထားတဲ့ မန္တလေးတိုင်း မိုးကုတ်မြို့ အရှေ့ပိုင်းဘက်မှာ လုံခြုံရေး ကင်းလှည့်နေတဲ့ တအာင်းရဲ ပစ်ခတ်ခံရခဲ့တယ်လို့ ဒေသခံတွေက ရွှေဖီမြေကို ပြောပါတယ်။
ဖြစ်စဉ်ဟာ ပြီးခဲ့တဲ့ မေလ ၁၂ ရက်က မိုးကုတ်မြို့မှာ လက်ပစ်ဗုံးပေါက်ကွဲတဲ့ကိစ္စနဲ့ ပတ်သက်ပြီး ရဲတပ်ဖွဲ့တွေက ရှောင်တခင်စစ်ဆေးတဲ့အချိန်မှာ အမည်မသိလူတစ်စုက ဆိုင်ကယ်နှစ်စီး စီးလာပြီး ၎င်းတို့ရဲ့ လွယ်အိတ်ထဲကနေ လက်ပစ်ဗုံးစနက်တံဆွဲပြီး ပစ်ခတ်ခဲ့တယ်လို့ ဖြစ်စဉ်သိရှိသူ အမျိုးသားတစ်ဦးက ပြောပါတယ်။
“မိုးကုတ်မြို့ လယ်ဦးဘက်မှာ ဖြစ်တာ။ သူတို့ပစ်လိုက်တဲ့အချိန်မှာ ဗုံးကမပေါက်ခင်ကပဲ ရဲတွေက ဝပ်ပြီး ရှောင်လိုက်တယ်။ သူတို့က ပြေးသွားတယ်။ အဲတစ်လုံးပေါက်ပြီး ရဲက သူတို့ကို သေနတ်နဲ့ လှမ်းပစ်တယ်။ သူတို့လည်း ဗုံးနဲ့ပြန်ပစ်ပြီးတော့ ပြေးသွားကြတယ်”
ပစ်ခတ်တဲ့ အဖွဲ့တွေထဲက တစ်ယောက်ကိုတော့ TNLAရဲ့ ရဲတပ်ဖွဲ့က ဖမ်းမိထားတာဖြစ်ပြီး ကျန်တဲ့သူတွေကိုတော့ ထပ်မံဖမ်းဆီးနိုင်ဖို့ စုံစမ်းနေဆဲဖြစ်တယ်လို့ အထက်ပါအမျိုးသားက ဆိုပါတယ်။
ပြီးခဲ့တဲ့ မေလ ၁၁ ရက် ည ၇နာရီခွဲအကျော်မှာ မိုးကုတ်မြို့ အရှေ့ပိုင်း ဘီးတောင်ရပ်ကွက်မှာရှိတဲ့ Music Zoneဘား ရှေ့မှာ အမည်မသိတဲ့အမျိုးသား ၂ ဦးက လက်ပစ်ဗုံး ၂လုံးကို လာရောက်ပစ်သွားခဲ့တဲ့ ဖြစ်စဉ် ဖြစ်ခဲ့ဖူးပါတယ်။
