လွေးထွေး၊ မေလ ၁၄ ရက်
မန္တလေးတိုင်း ပြင်ဦးလွင်နဲ့ ရှမ်းမြောက် နောင်ချိုမြို့နယ်ရှိ စစ်ကောင်စီတပ်ရဲ့ စစ်ဆေးရေးဂိတ်ဖြစ်တဲ့ ဝက်ဝံဂိတ်မှာ ဖြတ်သန်းသွားလာတဲ့ ကုန်တင်ကားနဲ့ ခရီးသည်ယာဉ်တွေကို စစ်ဆေးမေးမြန်းပြီး ကားသမား ၆ ဦးကိုလည်း ဖမ်းဆီးခေါ်ဆောင်သွားခဲ့တယ်လို့ ဖြစ်စဉ်ကိုမြင်တွေ့ခဲ့သူ ကားသမားတစ်ဦးရဲ့ ပြောပြချက်အရ သိရပါတယ်။
မေလ ၁၀ ရက်ကဖြစ်ပြီး နောင်ချိုကနေ ပြင်ဦးလွင်ဘက်ဆင်းတဲ့ ရှမ်းမြောက်က ကားသမားတချို့ကို ကားလိုင်စင်၊ ယာဉ်မောင်းလိုင်စင်နဲ့ မှတ်ပုံတင်တွေကို ၂ နာရီဝန်းကျင်ကြာအောင် စစ်ဆေးပြီး အဲထဲမှာမှ မသင်္ကာတဲ့ ကုန်ကားသမား ၄ ဦးနဲ့ ခရီးသည်ကား မောင်းတဲ့ ကားသမား ၂ ဦးကို ဖမ်းဆီးခေါ်ဆောင်သွားခဲ့တာ ဖြစ်ပါတယ်။
မျက်မြင်တွေ့သူ ကားသမားတစ်ဦးက “ကားတန်းရင်း စစ်တာပေါ့။ အကြာကြီးစစ်တာ။ ပြီးမှ အဲလူတွေက ကားဘေးထိုးထားပြီး ခေါ်သွားတာဘဲ။ ကြားသလောက်ဆို ဒီနေ့အထိ ပြန်မလွှတ်လာသေးဘူး။ သူတို့ကလည်း ဘယ်နေရာ၊ ဘယ်ဒေသကလဲတော့ မသိဘူး” လို့ ပြောပါတယ်။
ဝက်ဝံဂိတ်အပြင် နောင်ချိုနဲ့ မန္တလေးကြားမှာ စစ်ကောင်စီတပ်ရဲ့ စစ်ဆေးရေးဂိတ် အနည်းဆုံး ၈ ခုရှိပြီး စစ်ဆေးမေးမြန်းတာနဲ့ ငွေတောင်းတာတွေ ရှိနေတဲ့အပြင် ကားသမားတွေ မကြာခဏ ဖမ်းဆီးခံနေရတာနဲ့ လူပျောက်တာတွေလည်း ရှိနေကြောင်း ကားသမားတွေထံက သိရပါတယ်။
ပြင်ဦးလွင်နဲ့ နောင်ချိုကြားမှာ စစ်ကောင်စီတပ်နဲ့ တအာင်းတပ် TNLA တို့လည်း တိုက်ပွဲတွေ ခပ်စိပ်စိပ်ဖြစ်ပွားနေသလို လုံခြုံရေးအရ နှစ်ဖက်တပ်က စစ်ဆေးတင်းကြပ်နေတာကြောင့် ခရီးသည်နဲ့ ကုန်ကားတွေလည်း အခက်အခဲကြုံနေရတယ်လို့ ဆိုပါတယ်။
နောက်ထပ် ရှမ်းမြောက်မှ ခရီးသည် အမျိုးသမီးတစ်ဦးက “နောင်ချိုကျော်တာနဲ့ အစစ်ဆေးတွေ စတာဘဲ။ စစ်တပ်တွေရော TNLA ရော စစ်ပါတယ်။ တချို့ရက်နဲ့ နေရာတချို့က အစစ်ကြမ်းတာတွေတော့ ရှိတယ်။ တစ်ခေါက်နဲ့တစ်ခေါက် စစ်တဲ့လူ မတူသလို စစ်ဆေးပုံတွေကလည်း မတူဘူး။ အခြေအနေ ရှုပ်တဲ့ အချိန်မျိုးမှာဆိုရင် ဖမ်းဆီးတာတွေတောင် ရှိခဲ့တယ်” လို့ ပြောပါတယ်။
အလားတူ ပြီးခဲ့တဲ့ ဧပြီ ၂၁ ရက်ကလည်း စစ်ကောင်စီတပ်က ကားသမားတစ်ဦးကို တိုင်းရင်းသားလက်နက်ကိုင်တွေထံ အခွန်ဆောင်တယ်ဆိုပြီး ပြင်ဦးလွင်ရှိ စစ်ကောင်စီတပ်က ၃ ညတိတိ ဖမ်းဆီးထားခဲ့တဲ့ ဖြစ်စဉ်ရှိခဲ့ပါတယ်။
