ပို့လဘား၊ မေလ ၁၃ ရက်၊ ရပ်စောက်
ရှမ်းတောင် ရပ်စောက်မြို့နယ်မှာ ကုန်ပစ္စည်းရောင်းဝယ်နေတဲ့သူတွေကို စစ်ကောင်စီရဲ့ ထွေအုပ်ထောက်ခံချက်ပါမှသာ ကုန်ပစ္စည်း ဝယ်ယူခွင့်ပြုပေးတယ်လို့ ဒေသခံတွေက ပြောပါတယ်။
ပြီးခဲ့တဲ့ ဇန်နဝါရီလမှာ အင်တောမြို့နယ်ခွဲက ဈေးသည်တွေကို အထွေထွေအုပ်ချုပ်ရေးမှူးက ထောက်ခံချက်ကို ငွေပေးယူပြီးမှ ကုန်ပစ္စည်းဝယ်ယူခွင့်ရတယ်လို့ ဒေသခံအမျိုးသမီးတစ်ဦးက ပြောပါတယ်။
“ကျမတို့ ဈေးရောင်းမဲ့ပစ္စည်းတွေကို ရပ်စောက်မှာသွားဝယ်ရတယ်။ ဒီနေ့သွားဝယ်ရင် သူ့ထောက်ခံချက်ကိုယူပြီး ပိုက်ဆံ ပေးရတယ်။ မနက်ဖြန်သွားဝယ်ရင်လည်း မနက်ဖြန်ပြန်ပေးရတယ်။ ပစ္စည်းအမျိုးအစားအပေါ် မူတည်ပြီးပေးရတယ်။ အသား၊ငါးနဲ့ ရွက်စိမ်းတို့ဆိုရင် ၅ထောင်၊၁သောင်းပေးရတယ်။ ဆန်တို့ဆီတို့ကျတော့ ၅သောင်းပေါ့။ မြို့သေးသေးနဲ့ ရပ်ကွက်သေးသေးမှာပဲ ကျမတို့ ရောင်းနေတာကို သူတို့ကအဲလိုတွေလုပ်နေတာလေ။ တစ်နှစ်စာလည်းဆောင်ရ၊ နေ့တိုင်းလည်း သူတို့ကိုပေးနေရတော့ ဘာမှမကျန်တော့ဘူးလေ။ နေ့တိုင်း ပေးနေရတော့ အဆင်မပြေဘူး။ ကျမတို့ရှာသမျှအကုန်လုံးက သူတို့ကိုပဲ လုပ်ကျွေးနေသလိုဖြစ်နေပြီ”
ရပ်စောက်ကနေ အင်တောမြို့နယ်ခွဲမှာ ကုန်ပစ္စည်းသယ်လာသူတွေကို စစ်ကောင်စီတပ်ရဲ့ ဂိတ်တွေမှာလည်း ငွေ ၅သောင်းကနေ ၁သိန်း ပေးနေရတာဖြစ်ပြီး ငွေမပေးနိုင်ရင် သွားလာခွင့်မပြုဘူးလို့ ဆိုပါတယ်။
အင်တောမြို့မှာ စစ်ကောင်စီထံ တစ်နှစ်စာ အခွန်ဆောင်နေရတဲ့အပြင် ရှမ်းပြည်တိုးတက်ရေးပါတီ- SSPPထံလည်း တစ်နှစ်စာ အခွန်ဆောင်နေရတာကြောင့် အခွန်တောင်းတာတွေကို ဒေသခံတွေက လျှော့ချပေးစေချင်တယ်လို့ အဆိုပါအမျိုးသမီးက ပြောပါတယ်။
ပြီးခဲ့တဲ့ ဇန်နဝါရီလကလည်း ရပ်စောက်ကနေ ရှမ်းမြောက်ကို သွားမဲ့ ခရီးသည်တင်တဲ့ယာဉ်နဲ့ ကုန်တင်ကားတွေကို ဖြတ်သန်းခွင့်ပိတ်ပင်ထားပေမဲ့ တစ်ချို့ကားသမားတွေဟာ သိန်း၂၀၊ သိန်း ၄၀ ပေးပြီး ဖြတ်သန်းသွားလာနေရတယ်လို့ ကားသမားတွေထံက သိရှိရပါတယ်။
