အိုက်ပွီး၊ မေလ ၁၂ ရက်၊ ဒီပဲယင်း
စစ်ကိုင်းတိုင်း ဒီပဲယင်းမြို့နယ် အိုးထိမ်းကွင်းကျေးရွာ စာသင်ကျောင်း လေကြောင်း ဗုံးကြဲတိုက်ခိုက်မှုမှာ ကျောင်းသား ၂၀ ဦးနဲ့ ဆရာမ ၂ ဦး စုစုပေါင်း သေဆုံးသူ ၂၂ ဦး ရှိလာတယ်လို့ မြေပြင်ဒေသခံတစ်ဦးက ရွှေဖီမြေသို့ ပြောပါတယ်။
စစ်ကောင်စီရဲ့ မိတ္ထီလာလေတပ်မှ အိုးထိမ်းကွင်းရွာ စာသင်ကျောင်းကို ဒီနေ့ မေလ ၁၂ ရက် မနက် ၁၀ နာရီဝန်းကျင်မှာ ပေါင် ၅၀၀ ဗုံးသီးတစ်လုံးနဲ့ လေကြောင်းကနေ ဗုံးကြဲတိုက်ခိုက်ခဲ့တာပဲ ဖြစ်ပါတယ်။
လေကြောင်း ဗုံးကြဲတိုက်ခိုက်မှုကြောင့် ကျေးရွာစာသင်ကျောင်းမှာ စာသင်နေကြတဲ့ အသက် ၆ နှစ်မှ ၁၆ နှစ်အောက် ကလေးငယ်(အမျိုးသမီး) ၁၅ ဦး၊ ကလေးငယ်(အမျိုးသား) ၅ ဦးနဲ့ ကျောင်းဆရာမ ၂ ဦး သေဆုံးခဲ့ပါတယ်။
“ဒီညနေစာရင်းအရတော့ သေဆုံးသူ ၂၂ ဦးတော့ နာမည်စာရင်းနဲ့တကွ အတည်ပြုနိုင်ခဲ့ပါပြီ။ ဒါပေမဲ့ ထိခိုက်ဒဏ်ရာရတဲ့ ကလေးတွေထဲမှာလည်း အသက်အန္တရာယ် စိုးရိမ်ရတဲ့သူတွေလည်း ရှိတာကြောင့် သေဆုံးဦးရေ ထပ်တိုးလာနိုင်မလားပေါ့” လို့ မြေပြင်ဒေသခံတစ်ဦးက ရွှေဖီမြေသို့ ပြောပါတယ်။
ဒါ့အပြင် လေကြောင်း တိုက်ခိုက်မှုအတွင်း ဒဏ်ရာရသူ ၄၀ ခန့်ရှိပြီး လက်ရှိမှာ ၎င်းတို့ကို လုံခြုံတဲ့ ဆေးရုံ၊ ဆေးခန်းအသီးသီးမှာ ပြောင်းရွှေ့ထားပြီး အရေးပေါ် လူနာအနေနဲ့ ဆေးဝါးကုသမှု ခံယူနေကြရတယ်လို့ သိရပါတယ်။
“ဒဏ်ရာရတဲ့ လူနာတွေကိုလည်း ကျနော်တို့ လုံခြုံစိတ်ချရတဲ့နေရာတွေကို ကားတွေနဲ့ ပြောင်းရွှေ့ထားပါပြီ။ အခုအရေးပေါ်လူနာအနေနဲ့ သူတို့တွေကို လိုအပ်တဲ့ ဆေးဝါးကုသမှု ဆောင်ရွက်ပေးနေပါတယ်။ ဒဏ်ရာရတဲ့သူတွေထဲမှာလည်း ကျောင်းသား ကလေးတွေချည်းပါပဲ” လို့ မြေပြင်ဒေသခံတစ်ဦးက ရွှေဖီမြေသို့ ပြောပါတယ်။
စာသင်ကျောင်းပေါ်တည့်တည့် လေကြောင်းတိုက်ခိုက်မှုကြောင့် အပြစ်မဲ့ ကျောင်းသူကျောင်းသားတွေ အစုလိုက် အပြုံလိုက် ထိခိုက်သေဆုံးခဲ့ရတယ်လို့ ဒီပဲယင်းမြို့နယ် ပြည်သူ့အုပ်ချုပ်ရေးအဖွဲ့က ဒီနေ့ညမှာ ထုတ်ပြန်လာပါတယ်။
စစ်ကောင်စီက ဒီနေ့ မေလ ၁၂ ရက် တစ်ရက်အတွင်း ဒီပဲယင်းမြို့အပြင် စစ်ကိုင်းတိုင်း ချောင်းဦး၊ မော်လူး စတဲ့မြို့နယ်ကိုလည်း လေကြောင်းကနေ ဗုံးကြဲတိုက်ခိုက်ရာ အရပ်သား ၄ ဦး သေဆုံးခဲ့ပြီး ၅ ဦးထက်မနည်း ဒဏ်ရာ ရရှိတယ်လို့ သိရပါတယ်။
