အိုက်ပွီး၊ မေလ ၁၂ ရက်၊ ဒီပဲယင်း
စစ်ကိုင်းတိုင်း၊ ဒီပဲယင်းမြို့နယ်၊ အိုးထိမ်းကွင်းကျေးရွာက အလယ်တန်းစာသင်ကျောင်းကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်လို့ ကျောင်းသား ၁၁ ဦးနဲ့ ကျောင်းဆရာမ နှစ်ဦးသေဆုံးခဲ့တယ်လို့ မြေပြင်ဒေသခံတစ်ဦးက ရွှေဖီမြေသို့ ပြောပါတယ်။
ဒီနေ့ မေလ ၁၂ ရက်နေ့၊ မနက် ၁၀ နာရီဝန်းကျင်မှာ အိုးထိမ်းကွင်းကျေးရွာက ကျောင်းသားတွေ ပညာသင်နေကြတဲ့ NUG ရဲ့ အလယ်တန်းကျောင်းကို စစ်ကောင်စီတပ်က လေကြောင်းကနေ ဗုံးကြဲ တိုက်ခိုက်သွားတာဖြစ်ပါတယ်။
“ကျောင်းက အလယ်တန်းကျောင်းဆိုတော့ ကျောင်းသူ/သားတွေများတယ်။ ဆရာတွေလည်းများတယ်။ ပိုဆိုးတာက ဒီနေ့မနက် ဗုံးကြဲတာက ကျောင်းတည့်တည့်ကို ဗုံးကြဲသွားလို့ ထိခိုက်သေဆုံးမှုက ဦးရေပိုများသွားတယ်။ ကလေးတွေအလောင်းတွေဆို တစ်စစီဖြစ်သွားတယ်။ “လို့ မြေပြင်ဒေသခံတစ်ဦးက ရွှေဖီမြေသို့ ပြောပါတယ်။
ကယ်ဆယ်ရေးသမားတွေရဲ့ ရှာဖွေမှုတွေကြောင့် လက်ရှိမှာ ကျောင်းသား၊ ကျောင်းသူ ၁၁ လောင်းနဲ့ ဆရာမ နှစ်လောင်းကို တွေ့ရှိထားတယ်လို့ သိရပါတယ်။
“လောလောဆယ် အလောင်းရတာက ကလေး ၁၁ ယောက်ရယ်၊ ဆရာမ နှစ်ယောက်ရယ်။ အလောင်းတွေက တစ်စစီဖြစ်တဲ့အတွက် ရှာဖွေနေတာကြောင့် ဒီထက်ပို သေဆုံးမှုအရေအတွက် နှစ်ဆလောက်များမယ်။ ပဇီ၊ အနန့်ပါထက်ပိုဆိုးတဲ့ အခြေအနေပါ။”လို့ မြေပြင်ဒေသခံတစ်ဦးက ရွှေဖီမြေသို့ ပြောပါတယ်။
ထိခိုက်ဒဏ်ရာရရှိတဲ့ ကျောင်းသူ၊ ကျောင်းသားတွေကို ကားတွေနဲ့လုံခြုံစိတ်ချတဲ့နေရာတွေမှာ ပြောင်းရွှေ့ထားပြီး ဆေးဝါးကုသမှုတွေပြုလုပ်ပေးနေတယ်လို့ သိရပါတယ်။
ဒဏ်ရာရတဲ့ထဲမှာ အသက်အန္တရာယ်စိုးရသူတွေလည်းရှိပါတယ်။
ဒီနေ့၊ နေ့လယ်ထိ ရှာဖွေရေးလုပ်ငန်းတွေဆောင်ရွက်နေဆဲလို့ သိရပြီး နောက်ထပ်လေကြောင်း တိုက်ခိုက်မှုတွေ ပြုလုပ်နိုင်မှာကို ဒေသခံတွေကစိုးရိမ်နေကြပါတယ်။
စစ်ကောင်စီတပ်က ငလျင်ဒဏ်ကြောင့် ယာယီပစ်ခတ်တိုက်ခိုက်မှုရပ်စဲရေး ကြေညာထားတဲ့ ကာလမှာ အစုလိုက်၊ အပြုံလိုက် လူသေဆုံးမှုထိဖြစ်အောင် လေကြောင်း တိုက်ခိုက်ခဲ့တာဖြစ်ပါတယ်။
