ပို့လဘား၊ မေလ ၁၁ ရက်၊ မိုးကုတ်
တအာင်းတပ်မတော် ထိန်းချုပ်ထားတဲ့ မန္တလေးတိုင်း မိုးကုတ်မြို့အရှေ့ပိုင်းမှာ လက်ပစ်ဗုံး ပေါက်ကွဲမှု ဖြစ်ပွားခဲ့တယ်လို့ ဖြစ်စဉ်သိရှိသူ အမျိုးသားတစ်ဦးက ပြောပါတယ်။
ဒီနေ့ မေလ ၁၁ ရက် ည ၇ နာရီခွဲကျော်မှာ မိုးကုတ်မြို့အရှေ့ပိုင်း ဘီးတောင်ရပ်ကွက်မှာရှိတဲ့ Music Zone ဘားရှေ့မှာ အမည်မသိ အမျိုးသား ၂ ဦးက လက်ပစ်ဗုံး ၂ လုံး လာရောက် ပစ်ခတ်ခဲ့တယ်လို့ ပြောပါတယ်။
“လေယာဉ် လာကြဲတာ မဟုတ်ဘူး။ လူနှစ်ယောက်က အရပ်ဝတ် ဝတ်ပြီး ဆိုင်ကယ် စီးလာပြီးတော့ လက်ပစ်ဗုံး လာပစ်သွားတာ။ လူထိခိုက်တာတော့ မရှိဘူး။ လမ်းမှာ ပေါက်ကွဲတာ။ အဲဒီလက်ပစ်ဗုံးအားကြောင့် Music Zone ရဲ့ အပေါ်ထပ်က မှန်တွေတော့ ကွဲသွားတယ်။ အဲဒီအနီးအနားမှာရှိတဲ့ ကားတွေလည်း ထိသွားတယ်”
ပြီးခဲ့တဲ့ မေလ ၄ ရက်က မိုးကုတ်မြို့နယ် ဆင်ခွာရွာကို စစ်ကောင်စီတပ်က လေကြောင်းနဲ့ ဗုံးကြဲတိုက်ခိုက်ခဲ့တာကြောင့် အမျိုးသမီးတစ်ဦး သေဆုံးခဲ့ပါတယ်။
