ရွှေဖီမြေ၊ မေလ ၁၁ ရက်၊ ရွှေကျင်
ပဲခူးတိုင်း ရွှေကျင်မြို့နယ် ညောင်ခြေထောက်ကျေးရွာရှိ စစ်ကောင်စီရဲ့ တောင်ပိုင်းတိုင်းစစ်ဌာနချုပ် လက်အောက်ခံ ခြေမြန်တပ်ရင်း (ခမရ ၅၉၈)ဌာနချုပ်ကို PDF ပူးပေါင်းတပ်ဖွဲ့က တိုက်ခိုက်သိမ်းပိုက်နိုင်ခဲ့ပါတယ်။
မေလ ၈ ရက်က သိမ်းပိုက်ခဲ့တာဖြစ်ပြီး စစ်တပ်ရဲ့ ပွိုင့် ၅ စက်သေနတ်၊ ၇၅ နောက်ပွင့်၊ ၈၁ မမ၊ ၆၀ မမ လက်နက်ကြီးအပါအဝင် လက်နက်မျိုးစုံ ၈၃ လက်၊ ဂျန်မာစက် ၃ လုံးနဲ့ ခဲယမ်းတွေ သိမ်းဆည်းရမိခဲ့ကြောင်း အမျိုးသား ညီညွတ်ရေးအစိုးရ- NUG ရဲ့ ကာကွယ်ရေးဝန်ကြီးဌာနက ဒီနေ့ မေလ ၁၁ ရက် နေ့လယ်မှာ ထုတ်ပြန်လာပါတယ်။
တိုက်ပွဲအတွင်း စစ်တပ်ဘက်က ၃၀ ဦး သေဆုံးခဲ့ပြီး စစ်သုံ့ပန်း ၆ ဦးနဲ့ မိသားစုဝင် ၇ ဦးကို ဖမ်းဆီးထိန်းသိမ်းရမိခဲ့ပြီးတော့ စစ်ကောင်စီ တပ်ရင်းမှူးအပါအဝင် အရာရှိ၊ တပ်သား ၅၀ ဦးခန့်က စခန်းစွန့်ခွာထွက်ပြေးသွားခဲ့ကြောင်း ဖော်ပြထားပါတယ်။
စစ်ဆင်ရေးကို အထူးစစ်ဆင်ရေးတပ်ဖွဲ့- SOF၊ အမှတ် ၇၈၀၅၊ ၇၈၀၁ တပ်ရင်း၊ နဂါးဖြူတပ်ရင်း၊ တောင်ညိုတပ်ရင်း၊ ဒေါနတပ်ရင်း၊ Southern Eagle တပ်ရင်း၊ SOG တပ်ရင်း၊ ရောင်နီဒရုန်းအထူးတပ်ဖွဲ့၊ Cloudwings ဒရုန်းအထူးတပ်ဖွဲ့၊ အမှတ် (၃၇၀၁)၊ (၅၁၀၁) တပ်ရင်း၊ ရန်ကုန်ဗျူဟာစစ်ကြောင်း၊ ပဲခူးတိုင်း ပကဖ တိုက်ခိုက်ရေးအဖွဲ့တို့ ပူးပေါင်းတိုက်ခိုက်ခဲ့တယ်လို့ ဆိုပါတယ်။
ဒါ့အပြင် ရန်ကုန်တိုင်း ပကဖ တိုက်ခိုက်ရေးအဖွဲ့၊ မွန်ပကဖ တိုက်ခိုက်ရေးအဖွဲ့၊ LDF တပ်ဖွဲ့ဖြစ်တဲ့ KRF၊ UDF ရော့ကက်နဲ့ ဒရုန်းတပ်ဖွဲ့ စတဲ့ PDF တပ်ရင်းတပ်ဖွဲ့နဲ့အတူ ကရင်တပ်မတော်- KNU ရဲ့ တပ်မဟာ(၃)မှ တပ်ရင်း(၇)၊ ဒရုန်းအဖွဲ့လည်း ပူးပေါင်းတိုက်ခိုက်ခဲ့ကြောင်း ဆက်လက် ဖော်ပြထားပါတယ်။
