အိုက်ပွီး၊ မေလ ၁၀ ရက်၊ ချောင်းဦး
စစ်ကိုင်းတိုင်း ချောင်းဦးမြို့နယ် သုံးပန်းလှကျေးရွာက ရှင်ပြုအလှူပွဲကို စစ်ကောင်စီတပ် လေကြောင်းကနေ ဗုံးကြဲတိုက်ခိုက်လို့ မောင်ရှင်လောင်းနဲ့ ဖခင်အပါအဝင် ၃ ဦး သေဆုံးခဲ့တယ်လို့ ဒေသခံအမျိုးသားတစ်ဦးက ရွှေဖီမြေသို့ ပြောပါတယ်။
မြေပြင်မှာ တိုက်ပွဲ ဖြစ်ပွားခြင်းမရှိဘဲ သုံးပန်းလှကျေးရွာက ရှင်ပြုအလှူပွဲကို ဒီနေ့ မေလ ၁၀ ရက် နေ့လယ် ၁၂ နာရီဝန်းကျင်မှာ မုံရွာ(နမခ)မှ စစ်တပ်က လေထီးနဲ့ ဗုံးကြဲ တိုက်ခိုက်သွားတာလို့ သိရပါတယ်။
“ရွာအလှူအိမ်မှာ ဗုံးကြဲသွားတာပါ။ အလှူအိမ်ဆိုပေမဲ့ တခြားအလှူတွေလို အသံချဲ့စက်တွေနဲ့ ဖွင့်ပြီး အခမ်းအနားကြီးကြီးလုပ်တာ မဟုတ်ဘူး။ အတိုချုံ့ပဲ လုပ်တာပါ။ ရှင်ပြုမှာက မနက်ဖြန် ဒီနေ့ စကစ ဗုံးကြဲလိုက်တော့ မောင်ရှင်လောင်းနဲ့ အလှူ့ဒါယိကာက မရှိတော့ဘူး။ သေဆုံးသွားပြီ” လို့ ဒေသခံတစ်ဦးက ရွှေဖီမြေသို့ ပြောပါတယ်။
လေကြောင်း ဗုံးကြဲတိုက်ခိုက်မှုကြောင့် မောင်ရှင်လောင်းနဲ့ အလှူ့ဒါယိကာအပါအဝင် ၃ ဦး သေဆုံးခဲ့ပြီး အလှူ့ဒါယိကာမနဲ့ သမီးငယ်ကလည်း ပြင်းထန်ဒဏ်ရာ ရရှိခဲ့ပြီး လက်ရှိမှာတော့ ဆေးဝါးကုသမှု ခံယူနေကြရပါတယ်။
“ရွာမှာ ဘာတိုက်ပွဲမှရှိတာ မဟုတ်ပါဘူး။ ဒီလိုအခြေအနေမျိုးမှာ အခုလို လေကြောင်း တိုက်ခိုက်စရာ မလိုဘူး။ ဒါအရပ်သားတွေကို ရည်ရွယ်ချက်ရှိရှိ တိုက်ခိုက်တာ လုံးဝ စိတ်မကောင်းဘူး။ အခုအလှူပွဲကလည်း ငွေကြေး မတတ်နိုင်တဲ့ကြားကလုပ်တဲ့ အလှူပွဲပါ။ မနက်ဖြန် ဘုန်းကြီးကျောင်းမှာ သွားပြီး ဆွမ်းကပ်မယ်။ သင်္ဃန်းစည်းမယ်။ အဲလောက်ပါပဲ” လို့ ဒေသခံတစ်ဦးက ရွှေဖီမြေသို့ ပြောပါတယ်။
ပြီးခဲ့တဲ့ ဧပြီ ၆ ရက် ညပိုင်းကလည်း ချောင်းဦးမြို့နယ် သုံးပန်လှရွာကို လေကြောင်းကနေ ဗုံးကြဲတိုက်ခိုက်ခဲ့ရာ အရပ်သား ၃ ဦး သေဆုံးခဲ့သလို နှစ်ဦး ထိခိုက်ဒဏ်ရာ ရရှိခဲ့တယ်လို့ သိရပါတယ်။
