တရုတ်နိုင်ငံ သမ္မတ ရှီကျင့်ဖျင်နဲ့ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်တို့ မနေ့ မေလ ၉ရက်နေ့ ရုရှားနိုင်ငံ မော်စကိုမြို့မှာ တွေ့ဆုံခဲ့တယ်လို့ တရုတ်အစိုးရပိုင် Xinhus Newsက ဖော်ပြပါတယ်။
အဲတွေ့ဆုံပွဲမှာ ဗိုလ်ချုပ်မှူးကြီး မင်းအောင်လှိုင်က သမ္မတရှီကျင့်ဖျင်ကို နှစ်နိုင်ငံ စီးပွားကုန်သွယ်ရေး၊ စွမ်းအင်စတဲ့ ကဏ္ဍတွေမှာ ပူးပေါင်းဆောင်ရွက်မှု အားထားဆောင်ရွက်ရှိကြောင်း၊ မြန်မာနိုင်ငံရှိ တရုတ်စီမံကိန်းနဲ့ ဝန်ထမ်းတွေရဲ့ ဘေးကင်းလုံခြုံမှုကို အစွမ်းကုန် အာမခံပေးသွားမှာဖြစ်တဲ့ အကြောင်း ပြောသွားခဲ့တယ်လို့ သတင်းမှာ ဖော်ပြထားပါတယ်။
သမ္မတ ရှီကျင့်ဖိန်ရဲ့ ဉာဏ်ပညာကြီးတဲ့ ဦးဆောင်မှုအောက်မှာ တရုတ်ပုံစံခေတ်မီအသွင် ပြောင်းရေးဟာ သာလွန်ကောင်းမွန်တဲ့ အောင်မြင်မှုတွေ ရရှိခဲ့ကြောင်း တရုတ်နိုင်ငံနဲ့ ယုံကြည်စိတ်ချရတဲ့ ချစ်ကြည်ရင်းနှီးထိုက်တဲ့ အိမ်နီးချင်းအဖြစ် ထာဝရ လုပ်ဆောင်သွားဖို့လိုတယ်လို့ ထပ်မံပြောဆိုသွားခဲ့ပါတယ်။
သမ္မတရှီကတော့ မြန်မာနိုင်ငံက တရုတ်ဝန်ထမ်း၊အဖွဲ့အစည်း၊စီမံကိန်းတွေရဲ့ ဘေးကင်းလုံခြုံမှုကို လက်တွေ့ကျစွာ အာမခံပေးရန်၊ အွန်လိုင်းလောင်းကစား၊ ဆက်သွယ်ရေး လိမ်လည်မှုစတဲ့ နယ်စပ်ဖြတ်ကျော် ပြစ်မှုကျူးလွန်သူတွေကို တိုးမြှင့်တိုက်ဖျက်ရန် မျှော်လင့်ကြောင်း ပြောကြားသွားခဲ့ပါတယ်။
သမ္မတ ရှီနဲ့ ဗိုလ်ချုပ်မှူးကြီး မင်းအောင်လှိုင်တို့ဟာ မော်စကိုမြို့မှာ ကျင်းပတဲ့ ဆိုဗီယက်ပြည်ထောင်စု မဟာမျိုးချစ်စစ်အောင်ပွဲ နှစ် ၈ဝပြည့်အထိမ်းအမှတ်အခမ်းကို တက်ရောက်ခဲ့ကြတာဖြစ်ပါတယ်။
အခု တွေ့ဆုံမှုဟာ မြန်မာနိုင်ငံမှာ စစ်တပ်အာဏာသိမ်းပြီးနောက် တရုတ်ခေါင်းဆောင်နဲ့ စစ်ခေါင်းဆောင်တို့ ပထမဆုံးအကြိမ် တွေ့ဆုံမှုလည်း ဖြစ်ပါတယ်။
လက်ရှိ တရုတ်ဟာ စစ်ကောင်စီတပ်နဲ့ တိုက်ပွဲဖြစ်ပွားနေတဲ့ မြောက်ပိုင်းအဖွဲ့တွေကို တိုက်ပွဲရပ်တန့်ဖို့ ခြိမ်းခြောက်ဖိအားပေးနေပြီး ကိုးကန့်တပ် လားရှိုးမြို့ကနေ ပြန်လည်ဆုတ်ခွာပြီး စစ်ကောင်စီတပ်တွေ ပြန်လည်အုပ်ချုပ်စေဖို့ အဓိက လုပ်ဆောင်ပေးခဲ့တဲ့ နိုင်ငံလည်း ဖြစ်ပါတယ်။
လက်ရှိမှာလည်း တရုတ်ဟာ ညီနောင် ၃ဖွဲ့ထဲက တအာင်းတပ်ကိုလည်း တိုက်ပွဲရပ်တန့်ဖို့ ဖိအားပေးထားပေမယ့် စစ်ကောင်စီနဲ့ တအာင်းတပ်တို့ကြားမှာတော့ ဆွေးနွေးမှုက အဆင်မပြေသေးပါဘူး။
