မိုင်းရူပ၊ မေလ ၈ ရက်
ကိုးကန့်တပ်မတော်-MNDAAနဲ့ ရှမ်းပြည်တိုးတက်ရေးပါတီ-SSPPတို့ အကြား ဖြစ်ပွားနေတဲ့ နယ်မြေအငြင်းပွားမှုတွေနဲ့ ပတ်သက်ပြီး နှစ်ဖက်ခေါင်းဆောင်တွေ တွေ့ဆုံဖြေရှင်းရာမှာ အဆင်မပြေခဲ့ကြောင်း ရွှေဖီမြေက စုံစမ်းသိရှိရပါတယ်။
SSPP နဲ့ MNDAA အကြား ဖြစ်ပွားနေတဲ့ နယ်မြေအငြင်းပွားမှုနဲ့ ပတ်သက်ပြီး “ဝ” တပ်ဖွဲ့-UWSA ထိန်းချုပ်ထားတဲ့ ပန်ဆန်းမြို့မှာ ပြီးခဲ့တဲ့ ဧပြီလကုန်မှာ ၂ ဖက်ခေါင်းဆောင်တွေ တွေ့ဆုံဆွေးနွေးခဲ့ကြတာ ဖြစ်ပါတယ်။
ဆွေးနွေးပွဲမှာ ရှမ်းမြောက် သီပေါနဲ့ လားရှိုးမြို့နယ်ကြားရှိ နမ့်မ၊ ဟန်နားစတဲ့နေရာတွေကနေ ဆုတ်ခွာသွားမှာဖြစ်ပြီး SSPP အနေနဲ့ လားရှိုးမြို့နယ် နမ့်ပေါင်ကျေးရွာကနေ မူဆယ်မြို့နယ်အထိ တပ်ဆုတ်ပေးဖို့ ကိုးကန့်တပ်ကပြောကြားချက်ကို SSPP က လက်မခံတာကြောင့် ဆွေးနွေးပွဲမအောင်မြင်တာလို့ ဒီဖြစ်စဥ်ကို SSPP နဲ့နီးစပ်တဲ့ သတင်းအရင်းမြစ်တစ်ဦးက ရွှေဖီမြေကို ပြောပါတယ်။
” ၂၈ ရက်နေ့မှာ ၂ ဖက်တပ်တွေ ထိတွေ့မှုဖြစ်တယ်။ ၃ဝ ရက်မှာ တွေ့ဆုံဆွေးနွေးတယ်လို့ သိရတယ်။ ဟန်နား၊ နမ့်မတကြော MNDAA ဆုတ်ပေးမယ်။ SSPP က နမ့်ပေါင်ကနေ မူဆယ်အထိ မနေနဲ့ပေါ့။ ဆွေးနွေးပွဲက အဆင်မပြေသေးဘူး” လို့ ဆိုပါတယ်။
ဆွေးနွေးပွဲနဲ့ ပတ်သက်ပြီး MNDAA နဲ့ SSPP ဘက် တစုံတရာ ထုတ်ပြန်ထားတာမရှိသေးဘဲ အသေးစိတ်သိရဖို့ SSPP ရဲ့ ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန်ကို ဖုန်းနဲ့ ဆက်သွယ်ခဲ့ပေမဲ့ မရသေးပါဘူး။
ပြီးခဲ့တဲ့ ဧပြီ ၂၈ ရက်နဲ့ ၂၉ ရက်မှာ သီပေါနဲ့ လားရှိုးကြားရှိ နမ့်မ၊ ဟန်နားစတဲ့ကျေးရွာတွေမှာ MNDAA နဲ့ SSPP အကြားထိတွေ့မှု ၈ နေရာ၊ ၂ ဖက်ထိုးကြိတ်မှု ၂၄ နေရာအထိရှိခဲ့ပြီး ၂ ဖက်တပ်ဖွဲ့ဝင်တွေ ထိခိုက်ဒဏ်ရာရခဲ့ကြပါတယ်။
SSPPနဲ့ ကိုးကန့်တပ်ဟာ “ဝ”တပ်-UWSA ဦးဆောင်တဲ့ ပြည်ထောင်စုနိုင်ငံရေး ဆွေးနွေးညှိနှိုင်းမှုကော်မတီ-FPNCC ရဲ့ အဖွဲ့ဝင်တွေ ဖြစ်ကြပြီး
ရှမ်းမြောက်မှာ ၁၀၂၇ စစ်ဆင်ရေးနောက်ပိုင်း တိုင်းရင်းသားလက်နက်ကိုင်အကြား နယ်မြေအငြင်းပွားမှု မကြာခဏဖြစ်ပွားနေပါတယ်။
