မိုင်းပန်ပျော်၊ မေလ ၇ ရက်၊ တောင်ကြီး
ရှမ်းတောင် တောင်ကြီးမြို့မှာ အရက်မူးနေတဲ့ စစ်ကောင်စီ လက်အောက်ခံ ပအိုဝ်းပြည်သူ့စစ်- PNO တပ်သားဟောင်းတစ်ဦးက ကင်းလှည့်နေတဲ့ ရဲကို သေနတ်နဲ့ ပစ်ခတ်ခဲ့ရာ ရဲတစ်ဦး ဒဏ်ရာ ရခဲ့တယ်လို့ ရွှေဖီမြေက စုံစမ်းသိရှိရပါတယ်။
ဖြစ်စဉ်ဟာ ပြီးခဲ့တဲ့ မေလ ၁ ရက်က ဖြစ်ပွားခဲ့တာဖြစ်ပြီး ညပိုင်း ရဲက တောင်ကြီးမြို့ ဗိုလ်ချုပ်လမ်းမကြီးပေါ်ရှိ အိုးရှင်းစင်တာအနီး ကင်းလှည့်ရင်း စစ်ဆေးဖို့ ကားကို တားတဲ့အချိန်မှာ အရက်မူးနေတဲ့ PNO တပ်သားက သေနတ်နဲ့ပစ်ခတ်လို့ ရဲတစ်ဦး ဒဏ်ရာ ရခဲ့တယ်လို့ ဖြစ်စဉ်သိရှိသူ အမျိုးသားတစ်ဦးက ရွှေဖီမြေကို ပြောပါတယ်။
“ဖြစ်စဉ်ကတော့ ညဆိုတော့ ပုံမှန်လှည့်ကင်း ရှိတယ်လေ။ လှည့်ကင်းဆိုတော့ လာသမျှ ကားကို တားပြီး စစ်တာပဲ။ ညကလည်း ၁၁ ကျော်ပြီဆိုတော့လေ။ အဲဒီအချိန်မှာ သူ့ကားကို တားရမလားဆိုပြီး ကားရပ်ပြီး သေနတ်နဲ့ ထုတ်ပစ်တာ တစ်ချက်ပဲ ပစ်လိုက်ရတယ်။ ဝိုင်းဖမ်းလိုက်ကြတာ”
ပစ်ခတ်မှုကြောင့် နယ်ထိန်းရဲတစ်ဦးရဲ့ရင်ဘတ် ထိမှန်ပြီး အောင်ပန်း စစ်ဆေးရုံသို့ ပို့ဆောင်ထားကာ ဆေးကုသမှု ခံယူနေတယ်လို့ ဆိုပါတယ်။
ပစ်ခတ်ခဲ့တဲ့ PNO တပ်သားဟောင်းကိုတော့ တောင်ကြီး မြို့မရဲစခန်းမှာ ဖမ်းဆီးစစ်ဆေးပြီး အမှုဖွင့် အရေးယူနိုင်ဖို့ ဆောင်ရွက်နေတယ်လို့လည်း သိရပါတယ်။
