ခိုင်လေး၊ မေလ ၇ ရက်၊ ကျောက်ထု
မကွေးတိုင်း ဂန့်ဂေါခရိုင် ဆောမြို့နယ် တပြင်းရွာကနေ ကျောက်ထုမြို့ထဲ ပစ္စည်းလာဝယ်တဲ့ ဦးဇင်းတစ်ပါးနဲ့ ကပ္ပိယကို စစ်ကောင်စီတပ်က ဖမ်းဆီးပြီး စစ်ဆေးရိုက်နှက်ခဲ့တယ်လို့ ယောအလင်းတန်းမှ ကိုအောင်ကြီးက ရွှေဖီမြေကို ပြောပါတယ်။
ဦးဇင်းတစ်ပါးနဲ့ လိုက်ပါလာတဲ့ ကပ္ပိယတစ်ဦးဟာ စစ်တပ်ရဲ့ ပုံတွေကို ရိုက်ခဲ့ကြောင်း စွပ်စွဲပြီး ကျောက်ထုမြို့က စစ်တပ်စခန်းထဲ ဖမ်းဆီးခေါ်ဆောင်ကာ ရိုက်နှက်ရာကနေ လက်လွန်ခဲ့တယ်လို့ ဆိုပါတယ်။
”ကျောက်ထုမြို့ထဲက ဆောက်လုပ်ရေးပစ္စည်းဆိုင်မှာ ပစ္စည်းသွားဝယ်ကြတာပါ။ ဦးဇင်းနဲ့ပါသွားတဲ့ သူကတော့ လက်ရှိမှာ ဆေးကုသမှု ခံယူနေရပါတယ်။ ဦးဇင်းက ဒဏ်ရာ ပြင်းထန်တာကြောင့် ၄ ရက်နေ့မှာ ပျံလွန်တော်မူသွားပါတယ်။ စစ်တပ်က တပ်ထဲ ခေါ်သွားပြီး ဝိုင်းရိုက်ကြတာပါ”
တပြင်းရွာမှာ သီတင်းသုံးနေတဲ့ ဦးဇင်းနဲ့ ကပ္ပိယတစ်ဦးကို မေလ ၃ ရက် နေ့လယ်လောက်မှာ စစ်ဆေးဖို့ ဖမ်းဆီးခေါ်ဆောင်သွားတာဖြစ်ပြီး ညနေပိုင်းမှာ ပြန်လွှတ်ပေးခဲ့တာပဲ ဖြစ်ပါတယ်။
ပြန်လွှတ်လာတဲ့ ဦးဇင်းရဲ့ နောက်ကျောမှာ ထိုးသွင်းဒဏ်ရာ ၃ ချက်နဲ့ ကျောကုန်းတစ်ခုလုံး ညိုမဲခြင်း၊ ခြေထောက်တစ်ဖက် ကျိုးကာ မျက်နှာလည်း ဖောရောင်ပြီး ဦးဇင်းနဲ့ပါသွားတဲ့ ကပ္ပိယလည်း ကျောကုန်း ညိုမဲ၊ ပေါင်မှာ ထိုးသွင်းဒဏ်ရာနဲ့ မျက်နှာ ဖောရောင်နေတယ်လို့ ဆိုပါတယ်။
”စကစက ဦးဇင်းနဲ့ကပ္ပိယကို အဲဆိုင်မှာ ဝိုင်းရိုက်တာ မဟုတ်ဘူး။ သူတို့ရဲ့ပုံတွေကို ရိုက်တယ် PDF နဲ့ ဆက်သွယ်တယ်ဆိုပြီး စစ်တပ်စခန်းကို ဖမ်းဆီးခေါ်သွားတာ။ အာဏာသိမ်းပြီးတုန်းကလည်း ဒီလိုတွေက မကြာခဏဖြစ်တယ်။ တော်လှန်ရေး တပ်ဖွဲ့တွေကလည်း ကျောက်ထုမြို့က ကျေးရွာတော်တော်များများ ထိန်းချုပ်ထားတယ်” လို့ ယောဒေသခံတစ်ဦးက ရွှေဖီမြေကို ပြောပါတယ်။
ကျောက်ထုမြို့ပေါ်က စစ်တပ်ခန်း၊ ရဲစခန်း၊ လေတပ်စခန်းကိုသာ စစ်တပ်က ထိန်းချုပ်ထားတာဖြစ်ပြီး အခုလို ဝဥရာသီမှာ ဝဥတွေကို ချင်းတောင်တန်းကနေ တော်လှန်ရေးတပ် လာရောက် ရောင်းဝယ်တာတွေ ပြုလုပ်မှာကို စိုးရိမ်းတာကြောင့် ကုန်သွယ်ရေးလမ်းမကြီးမှာလည်း ဂိတ်ချစစ်ဆေးတာ ရှိနေတယ်လို့ ဆိုပါတယ်။
ကျောက်ထုမြို့အနီးမှာ စစ်ဆေးမှု တင်းကြပ်တာကြောင့် ဒေသခံတွေအနေနဲ့ အသွားအလာ အတတ်နိုင်ဆုံး မပြုလုပ်ကြဖို့နဲ့ မဖြစ်မနေ သွားလာမယ်ဆိုလည်း သတိနဲ့သွားလာကြဖို့ တော်လှန်ရေးတပ်ဖွဲ့တွေက တိုက်တွန်းပြောဆိုထားပါတယ်။
