မိုင်းရူပ၊ မေလ ၅ ရက်၊ စဥ့်ကူး
စစ်ကိုင်းတိုင်းနဲ့ မန္တလေးတိုင်းအစပ်မှာရှိတဲ့ စဥ့်ကူးမြို့နယ် ထုံကြီးရွာကို စစ်ကောင်စီ ဗုံးကြဲပြီးနောက် ဖြတ်သန်းသွားလာခွင့် ခေတ္တပိတ်ပင်ထားတယ်လို့ မြေပြင်အခြေအနေ သိရှိသူတွေက ရွှေဖီမြေကို ပြောပါတယ်။
ပြီးခဲ့တဲ့ မေလ ၃ ရက်မှာ စစ်ကောင်စီတပ်က ထုံကြီးကျေးရွာအပါအဝင် လက်ပန်လှကျေးရွာကို ဂျက်လေယာဥ်နဲ့ ဗုံးကြဲတိုက်ခိုက်ခဲ့ပြီးနောက် အခုလို ဖြတ်သန်းသွားလာခွင့်တွေ ပိတ်ထားတာ ဖြစ်ပါတယ်။
“ထုံးကြီးဆိပ်ကမ်းပေါ့။ စစ်ကိုင်းကနေ ဧရာဝတီမြစ်ကူးပြီးတော့မှ ထုံးကြီးကိုဆိုက်ပြီးတော့ မိုးကုတ်-မန္တလေး မိန်းလမ်းပေါ်ကို ရောက်တာပေါ့။ လေယာဥ်နဲ့ ကြဲသွားတော့ အဲဆိပ်ကမ်းကို ခဏပိတ်ထားတဲ့ သဘောပေါ့” လို့ မြေပြင်အခြေအနေသိရှိသူတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ မေလ ၄ ရက်တုန်းက ထုံကြီးရွာနဲ့ လက်ပန်လှရွာ ဗုံးကြဲတိုက်ခိုက်မှုမှာ သေဆုံးသူ ၁ ဦးနဲ့ ဒဏ်ရာရသူ ၄ ဦးအထိရှိပြီး နေအိမ်အများအပြားလည်း မီးလောင်ပျက်စီးခဲ့ပါတယ်။
အဲလမ်းပိုင်းကို တော်လှန်ရေးအင်အားစုတွေဖက်က ပိတ်ထားတာဖြစ်ပြီး ထုံကြီးရွာကျေးရွာဟာ တော်လှန်ရေးအင်အားစုတွေ ထိန်းချုပ်ထားတဲ့ နေရာဖြစ်တယ်လို့ သူက ဆက်ပြောပါတယ်။
ဒါ့အပြင် မနေ့ မေလ ၄ ရက်မှာလည်း စစ်ကောင်စီတပ်က သပိတ်ကျင်းမြို့နယ် ၇ မိုင်ဘက်ကို လေယာဥ်နဲ့ ဗုံးကြဲတိုက်ခိုက်မှု ပြုလုပ်ခဲ့ပြီး ထိခိုက်သေဆုံးမှုတော့ မရှိဘူးလို့ ရွှေဖီမြေက စုံစမ်းသိရှိရပါတယ်။
